Onlaın formatta «Jańa jaǵdaıdaǵy jastar: is-qımyl kezeńi» taqyrybynda ZEREN respýblıkalyq jastarǵa bilim berý jobasynyń qorytyndy jıyny ótip, onda Senat Tóraǵasy Máýlen Áshimbaev qatysýshylardy kele jatqan Táýelsizdik kúnimen quttyqtap, jastardyń egemendikti saqtaýdaǵy jáne memlekettilikti nyǵaıtýdaǵy mańyzdy rólin atap kórsetti, dep habarlady Senattyń baspasóz qyzmeti.
– Jeltoqsan – halqymyz úshin qasterli aı. Sondyqtan bul aı tek toı-dýmanǵa sebep bolmaýy kerek. Kerisinshe, jeltoqsanda ótken sharalardan ónege alyp, babalarǵa taǵzym etip, táýelsizdiktiń qadirin zerdeleýimiz qajet. Ásirese, ózderińizdeı jastar elimizdi nyǵaıtý jáne damytý úshin jumys isteýi tıis. Jastardyń eń basty mıssııasy – elge qyzmet etý, eldi jańa belesterge jetkizý. Elge qyzmet etý degen bılik tutqasyn ustap, sheneýnik bolý degen sóz emes. Sizder árqaısyńyz óz salalaryńyzda jetistikke jetip, bıikten kórinseńizder – eldiń damýyna qosylǵan eń úlken úles sol, – dedi Senat Spıkeri.
Máýlen Áshimbaev pandemııa sabaǵyna qatysty óz pikirimen bólisti. Atap aıtqanda ol qorshaǵan orta men materıaldyq resýrstarǵa uqypty qaraýdyń mańyzdylyǵyna toqtaldy.
– Tabıǵat pen qorshaǵan ortaǵa degen kózqaras ózgerýi kerek. El Prezıdentiniń tikeleı qatysýymen búginde ekologııalyq qozǵalys qarqyn alýda. Memleket basshysynyń bul bastamalaryn qoldaý mańyzdy. Adamdardyń jáne búkil memlekettiń kúndelikti ómirine Sustainable Development – ornyqty damý qaǵıdattaryn engizý qajet. Pandemııanyń basty qorytyndylarynyń biri – tabıǵatqa uqypty qaraýdy damytyp, tutynýshylyq minez-qulyq úlgilerinen arylý, – dedi Máýlen Áshimbaev.
Senat Tóraǵasynyń pikirinshe, bıylǵy jyldyń taǵy bir sabaǵy – kúndelikti ómirde adamı qatynastarǵa basymdyq berý.
– Pandemııa kezinde elimizde qıyn jaǵdaıǵa tap bolǵan jandarǵa rııasyz kómektesýge daıyn jaýapty adamdar kóp ekenine bárimiz kóz jetkizdik. Keshe ǵana Qasym-Jomart Kemeluly Volonter jylynyń jabylýynda bul týraly jan-jaqty aıtqan bolatyn. Rasynda da, biz otandastarymyzdyń ıgi isterimen maqtana alamyz. Bizdiń qoǵam, shyn máninde, óte jaýapty ekenin jáne qazaqstandyqtar qandaı da bir adamdar tap bolatyn problemalarǵa nemquraıdy qaraı almaıtynyn kórsetti, – dedi ol.
Sondaı-aq Senat Spıkeri pandemııa salamatty ómir saltyn qalyptastyrý qajettiligin kórsetkenin atap ótti. Ásirese, ımmýnıtetti kóterýge nazar aýdaryp, jaman ádetterden bas tartý jáne sportpen shuǵyldaný mańyzdy ekenine toqtaldy. Sonymen qatar M.Áshimbaev pandemııa qorytyndylarynyń biri retinde – bazalyq kásipterdiń mańyzdylyǵyn atady.
– Bazalyq mamandyqtarǵa qurmetpen qarap, olardyń kez kelgen memleket úshin mańyzdylyǵyn túsiný qajet. Pandemııamen kúreste bizdiń búkil qoǵam dárigerlerge, medısına qyzmetkerlerine, jedel járdem jáne qoǵamdyq kólik júrgizýshilerine, kommýnaldyq qyzmet jumysshylaryna súıendi. Bedeldi kóringen mamandyqtardyń artynan júgire berýdiń qajeti joq. Adamdar men qoǵamǵa qyzmet etýge múmkindik beretin mamandyqtardy tańdaý qajet. Adam baqytynyń negizi – jasampazdyq jáne adamdardyń ıgiligi úshin paıdaly ister atqarý, – dedi Senat Tóraǵasy.
Sońynda Máýlen Áshimbaev jastarǵa aldaryna úlken maqsattar qoıýdyń, óz betinshe tynymsyz eńbek etýdiń mańyzyn aıtty, sondaı-aq memlekettik ınstıtýttar olardyń bastamalaryna árdaıym qoldaýmen qajetti kómek kórsetedi dep sendirdi.
Is-shara barysynda Aqparat jáne qoǵamdyq damý mınıstri Aıda Balaeva ZEREN jobasynyń qorytyndylary men jastardy qoldaý boıynsha iske asyrylyp jatqan sharalar týraly aıtyp berdi.
– «Joba aıasynda jastar túrli sala boıynsha oqytý platformalaryna qatysyp, bilimderin jetildirýge múmkindik aldy. 2500-ge jýyq jastar ókilderi jobaǵa qatysyp, bilim aldy, kásibı mamandarmen kezdesip, oı-pikir almasty, – dedi Aıda Balaeva.
Open Talks sharasyna elimizdiń barlyq óńirlerinen jas volonterler, ekologııalyq belsendiler, medısınalyq jáne ǵylymı qyzmetkerler, prezıdenttik jastar kadrlyq rezerviniń músheleri, jastar birlestikteriniń kóshbasshylary, «Bolashaq» stıpendıattary, kolledjder men JOO stýdentteri qatysty.
Is-shara jemisti ǵylymı, shyǵarmashylyq, qoǵamdyq qyzmeti, sondaı-aq joǵary sporttyq jetistikteri úshin 2020 jylǵy «Daryn» memlekettik jastar syılyǵynyń laýreattaryn marapattaýmen aıaqtaldy. ZEREN jobasy 2018 jyldan bastap júzege asyrylyp keledi. Bul – bıznes-jobalardy iske asyrýǵa, Qazaqstannyń túkpir-túkpirinen belsendi jáne talantty jastardy anyqtaýǵa, olardyń basyn qosýǵa arnalǵan alań.