Elordada balalar men jasóspirimderge arnalǵan aýla klýbtarynyń jelisi damyp keledi. Búginde qalada 23 osyndaı uıym bar, onda 2500 oqýshy aınalysady. Olar úshin 28 sport seksııasy men 21 shyǵarmashylyq úıirme jumys isteıdi, dep habarlaıdy Egemen.kz.
«Astana Jastary» JRO 2015 jyldyń basynan aýla klýbtarynyń qyzmetine kýrator bolyp keledi. Sol ýaqytta qalada 6 aýla klýby bolsa, búginde olardyń sany 23-ke jetti. 2020 jyly shalǵaıdaǵy «Ilınka», «Kúıgenjar», «Chýgýnka», «Lesozavod» jáne «Kóktal» turǵyn alaptarynda 5 jańa aýla klýby ashyldy. 2021 jyly aýla klýbtarynyń sanyn 23-ten 28-ge, al tárbıelenýshilerdiń sanyn 2500-den 3000-ǵa deıin ulǵaıtý josparlanyp otyr», - dedi «Astana jastary» jastar resýrstyq ortalyǵynda.
Karantın jaǵdaıynda balalar sabaqqa qalada belgilengen sanıtarlyq-epıdemıologııalyq normalardy qatań saqtaı otyryp barady.
Aýla klýbtarynyń negizgi qyzmeti balalar, jasóspirimder men elorda jastarynyń bos ýaqytyn qamtamasyz etýge baǵyttalǵan. Aýla klýbtary oqýshylardyń shyǵarmashylyq, tanymdyq, ǵylymı, áleýmettik belsendilikterin arttyrady. Úıirmeler men seksııalar olar úshin aqysyz.
Aıta keteıik, 2020 jyldyń 12 aqpanynda Nur-Sultan máslıhaty «Aýla klýbtaryn jańǵyrtýdyń 2023 jylǵa deıingi tujyrymdamasyn» bekitken. Oǵan sáıkes aýla klýbtary qyzmetiniń basty mindeti - elordanyń tórt aýdanynda halyqtyń áleýmettik osal toptarynan turatyn jastardy buqaralyq sportqa, shyǵarmashylyq úıirmelerge tartý, ómirlik daǵdylardy úıretý arqyly ómir sapasyn jaqsartý.