Jańa jospar tanystyryldy
AQSh-tyń jańa saılanǵan prezıdenti Djo Baıden klımattyń ózgerýine qarsy josparyn tanystyrdy. Jospardy ázirge Senat maquldaǵan joq. Qurylatyn agenttikti afro-amerıkalyq basqarady degen sybys bar.
Buǵan deıin habarlaǵanymyzdaı, AQSh-tyń jańa prezıdentin ulyqtaý rásimi 20 qańtarǵa josparlanǵan. Alaıda Baıden qol qýsyryp otyrmaı, jańa jospar usynyp úlgerdi. «Biz úlken daǵdarystamyz. Pandemııamen qalaı birlesip kúressek, klımattyń ózgerýimen de solaı birlesip kúresýimiz kerek», dedi ol.
Tanystyrý barysynda Parıj kelisimine AQSh-tyń qaıtadan qosylatynyn málimdedi. «Amerıka bul joly jahandyq klımattyń ózgerýimen aldyńǵy shepte kúresedi» degen málimdeme jasady Baıden.
Donald Tramp basshylyq etip turǵanda AQSh Parıj kelisiminen shyqqan alǵashqy el bolyp edi. Al Baıden bul klımatty saqtaý mindeti júktelgen topty bilikti, talapty dep tanystyryp otyr. Bul topqa Soltústik Karolınanyń qorshaǵan orta máselelerine jaýapty Mıshel Regan jetekshilik etedi.
Sonymen birge prezıdent Baıden klımatpen kúres tolyqqandy jumys bolýy kerektigin basa aıtty. Aldaǵy kúnderi Ulttyq qaýipsizdik keńesi otyrysynda da bul máseleniń talqylanatyny belgili boldy.
Prezıdentke aıyppul salyndy
Chılıdiń prezıdenti Sebastıan Pınerge Chılıdiń quzyrly organdary karantın kezinde maska taqpaǵany úshin 3,5 myń AQSh dollary kóleminde aıyppul saldy.
Mundaı sheshim qabyldaýǵa jelidegi sýret sebep boldy. Oqıǵa kýágerleriniń sózine qarasaq, prezıdent jaǵajaıda ózimen sýretke túsýge suranǵan kelinshektiń kóńilin qaldyrmaı, kelisimin bergen kórinedi. Alaıda fotosýrette memleket basshysy maska taqpaǵan.
Chılı jańalyq agenttikteriniń habarlaýynsha, prezıdentke aıyppul salý týraly sheshimdi Valparaıso aımaǵynyń Densaýlyq saqtaý mekemesi qabyldaǵan.
Bul prezıdent Pınerdiń qoǵamdyq tártipti alǵash buzýy emes. Oǵan buǵan deıin de bir márte eskertý jasalǵan eken. Al ekinshi áreketi jazasyz qalmady. 2 551 450 peso aıyppul AQSh dollaryna shaqqanda 3,5 myń dollarǵa teń.
Brıtanııa Sıngapýrmen tegin saýda kelisimine qol qoıdy
Brıtanııa Sıngapýrmen erkin saýda kelisimine keldi. Bul sheshim Breksıt nátıjesindegi ekonomıkany retke keltirý maqsatynda qabyldandy deıdi. Qujat Sıngapýrda eki eldiń saýda mınıstrleriniń qatysýymen qabyldandy. Jańa ereje sheńberinde jylyna 18 mlrd eýro kóleminde saýda jasalmaq.
Brıtanııa Eýroodaqtan shyqqaly saýdaǵa baılanysty problema paıda bolǵanyn, dereý sheshim qabyldaý kerektigin áýelden aıtyp júrgen-di. Endigi kezekte Sıngapýr men Brıtanııa arasynda tehnıka, kólik, farmasevtıka ónimderi men medısınalyq qurylǵy ákelýge shekteý bolmaıdy. Atalǵan zattardy shekaradan erkin ótkizýge 2024 jylǵa deıin ruqsat bar. Brıtanııa dál osyndaı kelisimdi Japonııamen de túzgen. Qazan aıynda qol qoıylǵan qujat Londonnyń Breksıtten keıingi alǵashqy ekijaqty kelisimi retinde hattalyp qaldy.
Brıtanııanyń saýda mınıstri Lız Trýss Sıngapýrmen kelisimge kelý bolashaqta jaqsy nátıje beredi degen senimin bildirdi.
«Qazir Brıtanııa qaıtadan qarjylyq azat elge aınaldy. Biz búginde erkin saýda qatynasyna ashyqpyz. Sıngapýr – Brıtanııanyń negizgi saýda jáne ınvestısııalyq seriktesi. Al Sıngapýr úshin Brıtanııa Eýropadaǵy ınvestısııa baǵyttaıtyn birden bir memleket. Kelisim brıtanııalyq kompanııalarǵa Sıngapýrmen baılanysty nyǵaıtýǵa múmkindik beredi», dedi mınıstr.
Daıyndaǵan
Svetlana ǴALYMJANQYZY,
«Egemen Qazaqstan»