Qazaqstan Prezıdentiniń atyna kóptegen memleketter men Úkimet basshylarynan jáne halyqaralyq uıymdardyń jetekshilerinen, burynǵy memleket basshylarynan, memleket qaıratkerlerinen, dıplomatııa jáne qoǵam, isker toptardyń ókilderinen jańa 2021 jylmen quttyqtaǵan jedelhattar kelip túsýde, dep habarlaıdy Egemen.kz Aqordanyń baspasóz qyzmetine silteme jasap.
Reseı Prezıdenti Vladımır Pýtın Jańa jylmen quttyqtaýynda Reseı men Qazaqstan arasyndaǵy qarym-qatynastardyń strategııalyq seriktestik jáne odaqtastyq rýhynda tabysty damyp kele jatqanyn aıtqan.
– Bıylǵy jyly baýyrlas halyqtarymyzdyń ıgiligi úshin, Eýrazııa qurlyǵyndaǵy turaqtylyq pen qaýipsizdikti nyǵaıtý maqsatynda ekijaqty, aımaqtyq jáne halyqaralyq kún tártibindegi ózekti máseleler boıynsha tabysty jumysymyzdy odan ári jalǵastyra beremiz dep senemin. Qurmetti Qasym-Jomart Kemeluly, Sizge jáne jaqyndaryńyzǵa zor densaýlyq pen amandyq, al Qazaqstan halqyna beıbitshilik, baqyt jáne ósip-órkendeý tileımin, – delingen Reseı basshysynyń jedelhatynda.
О́zbekstan Prezıdenti Shavkat Mırzııoev óziniń quttyqtaý jedelhatynda 2020 jyly ekijaqty yntymaqtastyqty damytýdaǵy zor jetistikterdi atap ótken. О́zbek kóshbasshysy ózara tıimdi kelisimder men birlesken jobalardyń, onyń ishinde saıası, saýda-ekonomıkalyq, kólik, energetıkalyq, ónerkásiptik kooperasııa boıynsha, mádenı-gýmanıtarlyq jáne óńiraralyq yntymaqtastyqtyń qarqyndy júzege asyrylýyn óte joǵary baǵalaǵan. «Bizdiń kóp baǵytty jáne uzaq merzimdi strategııalyq áriptestigimiz ben dostyq qarym-qatynasymyz aldaǵy ýaqytta da qarqyndy damı beretinine senimdimin», – delingen jedelhatta.
Belarýs Prezıdenti Aleksandr Lýkashenko Belarýs pen Qazaqstan ózara túsinistikke, berik dostyqqa jáne syılastyqqa qurylǵan uzaq merzimdi seriktestik qarym-qatynastarǵa adaldyǵyn birneshe ret dáleldegenin atap ótken. «2021 jyly biz Belarýs-Qazaqstan yntymaqtastyǵynyń áleýetin tolyq paıdalanýǵa, jańa jasampaz bastamalardy júzege asyrýǵa kirisetinimizge senimdimin», – delingen jedelhatta.
Sonymen qatar Qasym-Jomart Toqaevty QHR Tóraǵasy Sı Szınpın, Ázerbaıjan Prezıdenti Ilham Álıev, Armenııa Prezıdenti Armen Sarkısıan, Armenııa Premer-mınıstri Nıkol Pashınıan, Qyrǵyzstan Prezıdentiniń mindetin atqarýshy Talant Mamytov, Tájikstan Prezıdenti Emomalı Rahmon, Ýkraına Prezıdenti Vladımır Zelenskıı, Germanııa Prezıdenti Frank-Valter Shtaınmaıer, Germanııanyń Federaldy Kansleri Angela Merkel, Ulybrıtanııa Premer-mınıstri Borıs Djonson, BAÁ Prezıdenti Halıfa ben Zaıd Ál Nahaıan, BAÁ Vıse-prezıdenti, Premer-Mınıstri Muhammed Ben Rashıd Ál Maktým, Abý-Dabıdiń taq murageri, BAÁ Qarýly Kúshteri Bas qolbasshysynyń orynbasary Muhammed ben Zaıd Ál Nahaıan, Iordanııa Koroli II Abdalla, Kýveıt Ámiri Navaf ál-Ahmed ál-Djaber as-Sabah, Aýǵanstan Prezıdenti Muhammed Ashraf Ǵanı, Iran Prezıdenti Hasan Rýhanı, Mysyr Prezıdenti Abdel Fattah As-Sısı, Polsha Prezıdenti Andjeı Dýda, Fınlıandııa Prezıdenti Saýlı Nıınıstıo, Lıtva Prezıdenti Gıtanas Naýseda, Latvııa Prezıdenti Egıls Levıts, Irlandııa Prezıdenti Maıkl Hıggıns, Sıngapýr Prezıdenti Halıma Iаkob, Slovenııa Prezıdenti Borýt Pahor, Horvatııa Prezıdenti Zoran Mılanovıch, Norvegııa Koroli V Harald, Danııa Patshaıymy II Margrete, Jańa Zelandııanyń General-gýbernatory Petsı Reddı, Reseı Úkimetiniń Tóraǵasy Mıhaıl Mıshýstın, Túrki tildes memleketter yntymaqtastyǵy keńesiniń Bas hatshysy Baǵdad Ámireev, Eýrazııalyq ekonomıkalyq komıssııa alǵasynyń Tóraǵasy Mıhaıl Mıasnıkovıch, TMD Atqarýshy hatshysy – Atqarý komıtetiniń tóraǵasy Sergeı Lebedev, Ujymdyq qaýipsizdik shart uıymynyń Bas hatshysy Stanıslav Zas, NATO-nyń Bas hatshysy Iens Stoltenberg, TÚRKSOI uıymynyń Bas hatshysy Dúısen Qaseıinov, Reseı Federasııasy Federaldyq Jınalysy Federasııa Keńesiniń tóraıymy Valentına Matvıenko, Máskeý jáne búkil Reseı Patrıarhy Kırıll, BUU Bas hatshysynyń Ortalyq Azııa boıynsha arnaıy ókili Natalıa German, Eýrazııalyq ekonomıkalyq odaq Sotynyń tóraǵasy Jolymbet Báıishev, Horvatııanyń burynǵy Prezıdenti Stepan Mesıch jáne Sıngapýrdyń burynǵy Premer-mınıstr Go Chok Tong jańa jylmen quttyqtap, jedelhat jiberdi.
Budan bólek Memleket basshysynyń atyna Eýrazııalyq Damý Banki basqarma tóraǵasy Nıkolaı Podgýzovtan, Avıasııa jáne áýe keńistigin paıdalaný jónindegi memleketaralyq keńes prezıdenti Tatıana Anodınadan, AQSh, Túrkııa, Chehııa, Horvatııa, Estonııa, Reseı, Italııa elderiniń Qazaqstandaǵy elshilerinen, «Lýkoıl» kompanııasynyń prezıdenti Vagıt Alekperovten, VTB Bankiniń prezıdenti–basqarma tóraǵasy Andreı Kostınnen, «Grýppa Safmar» AQ dırektorlar keńesiniń tóraǵasy Mıhaıl Gýserıevten, Reseı Federasııasy Orynbor jáne Penza oblystarynyń gýbernatorlary Denıs Pasler men Ivan Belozersevtan, Baıqońyr qalasy Ákimshiliginiń basshysy Konstantın Býsygınnen, «Rossııa segodnıa» HAA bas dırektory Dmıtrıı Kıselıovten, Reseı Federasııasy Birlesken ıadrolyq zertteýler ınstıtýtynyń dırektory Vıktor Matveevten quttyqtaý jedelhattary kelip tústi.