«Atameken» UKP júrgizgen zertteý nátıjesinde eldegi aýtsaıder ýnıversıtetterdiń tizimi jarııalandy, dep habarlaıdy Egemen.kz
Bilim jáne ǵylym mınıstrliginiń tapsyrysymen «Atameken» UKP úsh jyl qatarynan joǵary oqý oryndary bilim berý baǵdarlamalarynyń reıtıngin júrgizip keledi. Reıtıng «Túlekterdiń mańsaptyq perspektıvasy», «Bilim berý baǵdarlamasynyń sapasy» jáne «Bilim alýshylardyń jetistikteri» atty úsh blokty qamtıtyn 17 krıterıı negizine júrgiziledi. 2020 jyly zertteý sheńberinde 2 myń bilim berý baǵdarlamasy qamtyldy, 68 myń túlektiń jumysqa turýyna taldaý jasaldy.
«Atameken» UKP Adamı kapıtaldy damytý jónindegi departament dırektory Azamat Beısembınov: «Qyzyqty jaıt bar: reıtıngte biz baklavrıatty saraladyq, barlyǵy 68 myń túlekke zertteý júrgizildi. Sonyń ishinde 12 paıyzy magıstratýrada bilim jalǵastyrdy, qalǵany naryqqa ketken. Barlyq baǵdarlamalar boıynsha jumyspen qamtý kórsetkishi 71%, al eńbekpen qamtylýdyń joǵary paıyzyn «densaýlyq saqtaý» jáne «medısına» salasynyń túlekteri kórsetip otyr. Ol 81 paıyzdy qurady», dedi ol.
Qazaqstannyń barlyq óńirlerinen 600-den astam sarapshy qatysyp, nátıjesinde 108 ýnıversıtet boıynsha 6 myń saraptamalyq qorytyndy shyǵaryldy. Túlekterdiń eńbekpen qamtylýy boıynsha eń nashar ýnıversıtetterdiń tizimi mynadaı:
1. «Syrdarııa» ýnıversıteti
2. Shymkent ýnıversıteti
3. Halyqaralyq gýmanıtarlyq-tehnıkalyq ýnıversıteti
4. «Astana» ýnıversıteti
5. Taraz ınnovasııalyq gýmanıtarlyq ýnıversıteti
6. Akademık A.Qýatbekova halyq dostyǵy ýnıversıteti
7. Shet tilderi jáne iskerlik mańsap ýnıversıteti
8. Qazaq-Orys halyqaralyq ýnıversıteti
9. «Bolashaq» ýnıversıteti, Qyzylorda qalasy
10. «Aqmeshit» gýmanıtarlyq-tehnıkalyq ınstıtýty