Qoǵam qaıratkerleri men saıasatkerler Parlament saılaýynyń ereksheligi, Qazaqstannyń saıası reformalary men jalpy saılaý kampanııasynyń uıymdastyrylýy men ótkizilýin jáne saılaýdyń mańyzdylyǵyn talqylady, dep habarlaıdy Egemen.kz.
Qazaqstan saıası ǵylymdar qaýymdastyǵy uıymdastyryp otyrǵan Sailau Talks-2021 jobasyna Emın Askerov, Talǵat Qalıev, Rasýl Jumaly, Aleksandr Danılov, Dastan Kósherbaev jáne t.b. sarapshylar qatysty.
Eýrazııalyq ıntegrasııa ınstıtýty Kommýnıkatıvtik is-sharalar jáne vızýaldy jobalar ortalyǵynyń jetekshisi Arman Eshmuratovtyń aıtýynsha bul jolǵy saılaýdyń ereksheligi – proporsıonaldy prınsıp ustaný.
"2021 jyldan bastap Qazaqstanda depýtattyqqa partııa tizimi arqyly saılanady. Onyń nátıjesi qalaı bolatynyn kóre jatarmyz. Buryn ózim máslıhatqa saılanǵanmyn. Ol kezde okrýgtegi saılaýshylarmen tyǵyz jumys istedim. Al qazir partııalyq tizimdegiler qalaı jumys istegenin áleýmettik jeliler arqyly kórýge bolady. Olar kóp jumys atqardy. Biz ár kandıdattyń qandaı jumys atqarǵanyn kórip otyrdyq. Bolashaqta áleýmettik jeliler arqyly úgit-nasıhat jumystaryn júrgizý sharalary kóbeıe beredi dep oılaımyn. Bul – óte jaqsy. Bul aımaqtyq saılaý úshin – jańashyldyq. Partııalyq saılaýaldy baǵdarlamalar qalaı júzege asatynyn ýaqyt kórsetedi", deıdi ol.
Sondaı-aq, Qazaqstan strategııalyq zertteýler ınstıtýtynyń jetekshi ǵylymı qyzmetkeri Almas Arzyqulov burynǵy saılaý men qazirgi saılaýdyń ereksheligine toqtalyp ótti.
"Buryn saılaý kezinde úgit-nasıhat toby aımaqtarǵa shyǵyp, úlken zaldarda ártúrli ujymmen kezdesetin. Pandemııaǵa baılanysty ol sharalar qysqardy, biraq barynsha áleýmettik araqashyqtyqty saqtaı otyryp, azdaǵan adammen kezdesýler boldy. Burynnan bar úsh partııa jergilikti jerlerde óz jumysyn júrgizdi, al keıin qosylǵan partııalar jergilikti jerlerde ókilderiniń az bolýyna baılanysty olardyń jumysyn ortalyqtan barǵan toptar júrgizdi", dedi Arman Eshmuratov.