Qarabaq túıini tarqatylyp keledi

Úshjaqty kezdesý jabyq esik jaǵdaıynda ótti. V.Pýtın jıyn bastalar aldynda kóp­shilik aldynda sóz sóıledi. Reseı prezıdenti Ázerbaıjan jáne Armenııamen tatý kór­shi­lik qarym-qatynasty jaq­sy baǵalaıtynyn, sondaı-aq Ázer­baıjan men Armenııa tara­pynyń Reseıdiń Taýly Qara­baqtaǵy atysty toqtatý jónin­degi áreketine qoldaý kórset­kenine rızashylyǵyn bildirdi.

Reseı prezıdenti 2020 jyl­dyń qarashasynda jasalǵan kelisimder ret-retimen júzege asyrylyp jatqanyn jáne osy árekettiń Taýly Qarabaqtaǵy shıelenisti Armenııa men Ázer­baıjan halqynyń múddesine saı, ádil retteýge múmkindik beretinine toqtaldy.

Kelissózderden keıin mem­le­ket­ter basshylary ortaq málim­­demege qol qoıdy. Onda Taýly Qarabaqtaǵy ınfra­qu­ry­lymdyq jobalardy damytý máselesi qamtylǵan. Atap aıtqanda, aımaqtyń ekono­mıkalyq jáne kólik qatynasy máselesin sheshý úshin jumys toby qurylady. Oǵan úsh eldiń premer-mınıstrleriniń orynbasarlary jetekshilik etip, 30 qańtarǵa deıin kezdesýi tıis.

Jıyn aıaqtalǵan soń jýrnalısterge suhbat bergen Ilham Álıev kelissózderdiń jemis­ti bolǵanyn jetkizip, Taýly Qarabaq túıini tarqatylyp kele jatqanyna toqtaldy. Onyń aıtýynsha, aımaqtaǵy ınf­ra­­qurylymdy jandandyrý máselesi barlyq taraptyń múddesine saı keledi.

Sondaı-aq I.Álıev Ázer­baı­jannyń Nahıchevan avtonomııaly res­pýb­­lıkasymen tikeleı qatynas jasaýǵa múm­kindik týǵanyna erekshe ek­pin berdi. Álıevtiń sózine qara­ǵanda, Armenııa tarapyna da Ázerbaıjan arqyly Reseı, Iranǵa shyǵýyna jol ashylady.

Armenııa premer-mınıstri Nıkol Pashınıan áli de  talqy­laıtyn máselelerdiń kóp eke­nine toqtaldy. Onyń paıymdaýynsha, atysty toqtatýdyń ózi zor jetistik boldy. Qazir aımaqtaǵy kólik qatynasyn jandandyrý kún tártibinde tur. Endi Taýly Qarabaqtyń mártebesin aıqyndaý qajet.

Esterińizge sala ketsek, byl­tyrǵy qyrkúıekte Taýly Qara­baq aımaǵynda qaqtyǵys ór­shi­di. Ázerbaıjan men Arme­nııa jaǵdaıdyń ýshyǵýyna bir-birin aıyptady. Baký men Erevan ara aǵaıyn elderdiń kómegimen bir­neshe ret atysty toqtatý týraly kelisimge kelgen. Biraq kóp uzamaı qaqtyǵys qaıta jalǵasty.

Aqyry Reseıdiń araǵa túsýi­men Armenııa men Ázerbaı­jan soǵysty toqtatý jónindegi keli­sim­ge keldi. Sóıtip 10 qarasha­da 44 kúnge sozylǵan qaqtyǵystyń núktesi qoıyldy.

Kelisimge sáıkes, Ázerbaı­jan soǵys kezinde azat etken Taýly Qarabaqtyń bir bó­li­gin jáne Armenııa basyp al­ǵan 7 aýdandy ózine qaı­tar­­d­y. Armenııa aýmaǵynan Áze­r­baı­­jannyń negizgi terrı­to­rııa­syn Nahıchevan aýmaǵy­men jalǵaıtyn dáliz berildi. Sony­men qatar Taýly Qara­baqty Armenııamen baılanystyratyn dáliz quryldy.