Elimiz Táýelsizdigi kúnine arnalǵan saltanatty shara AQSh astanasy Vashıngtonda atalyp ótti. Bul týraly «Habar» telearnasy habarlady.
Qazaqstan Respýblıkasy Táýelsizdigi kúnimen eń birinshi bolyp AQSh memlekettik hatshy Djon Kerrı quttyqtady. Odan ári sóz memlekettik hatshysynyń kómekshisi Nısha Desaı Bısvalǵa berildi: «Qazaqstan ózin turaqtylyq, qaýipsizdik jáne ekonomıkalyq damý kórsetkishi boıynsha óńirdegi kóshbasshy retinde tanytty. Qazaqstannyń bastamalary aımaqtaǵy ǵana emes, álemdik deńgeıdegi problemalardy sheshýge oń áser etýde. Jalpy, Nursultan Nazarbaevtyń «jasyl ekonomıka» bastamasy – tek bir ǵana memleket úshin emes, halyqaralyq qaýymdastyqqa úlgi bolarlyq ıdeıa»,-dedi ol.
Bul rette Nısha Desaı Bısval AQSh pen Qazaqstannyń berik baılanysy jyl sanap artyp kele jatqanyn aıtyp, qazir Aýǵanstandaǵy turaqtylyqty qamtamasyz etýde eki el qaıtadan bilek tirese jumys jasap jatqanyn tilge tıek etti. Al kelesi kezekte yqylas peıilderin bildirgen azamattardyń pikirleri bylaısha órbidi.
Stıv Stokman, Tehas shtatynan kongressmen: «Qazaqstandy Iаdrolyq qarýsyzdaný men álemdegi beıbitshilikti ornatýǵa erekshe úles qosqan el retinde jaqsy bilemiz. Biz Tehas astanasy Hıýston men Qazaqstan arasyndaǵy áýe baılanysynyń ornaýyn asyǵa kútýdemiz. Bul eki taraptyń munaı jáne gaz salasyndaǵy baılanysyn oń jolǵa qoıar edi».
Bıll Kıtıng, Massachýsets shtatynan kongressmen:
«Qazaqstannyń «Jańa Uly Jibek Joly» jobasyna AQSh úlken qyzyǵýshylyq tanytyp otyr. Sondaı-aq, biz Qazaqstannyń «jasyl ekonomıka» bastamasyn qoldaımyz. Bul elderińizdiń energetıkalyq resýrstardy únemdeýge den qoıyp otyrǵanyn kórsetedi».
AQSh elimizdi tek strategııalyq seriktes retinde ǵana qarastyrmaıdy. Sarapshylardyń dáleline júginsek, Qazaqstan – Azııa men Eýropany baılanystyryp turǵan negizgi memleket.
Baqytbek Keneshuly.
Derekkóz: «Habar» telearnasy.