Memleket Basshysy Qasym-Jomart Toqaevtyń tapsyrmasymen 1 aqpanda Qazaqstanda «Spýtnık V» erikti vaksınasııalaý naýqany bastalady. Ýaǵdalastyq negizinde Qaraǵandy farmasevtıkalyq kesheni elge «Spýtnık V» vaksınalarynyń alǵashqy partııasyn jetkizdi, dep habarlaıdy Egemen.kz QR Densaýlyq saqtaý mınıstrligine silteme jasap.
Jalpy, aqpan aıynda Qaraǵandy farmasevtıkalyq kesheni vaksınanyń 112 myń dozasyn, naýryzda - 150 myń, sáýirden maýsymǵa deıin – aı saıyn 600 myń dozadan jetkizetin bolady.
Sondaı-aq sáýir aıynan bastap 75 myń doza kóleminde QazCovid-in otandyq vaksınasyn egý jáne ony aı saıyn 500 myń dozaǵa deıin ulǵaıtý josparlanyp otyr.
«Birinshi kezekte halyqtyń jekelegen toptary – medısına qyzmetkerleri, polıseıler, áskerı qyzmetshiler jáne t. b. vaksınalaýǵa jiberiledi. Vaksına alatyn adamda profılaktıkalyq egýge qarsy kórsetilimder bolmaýy tıis. Vaksınalaý aldynda dárigerdiń mindetti tekserý jumystary júrgiziledi. El boıynsha egý pýnktteriniń daıyndyǵy tekserildi, profılaktıkalyq egýdi júrgizý máseleleri boıynsha standartty operasııalyq rásimder bekitildi, 2 myńnan astam medısına qyzmetkerleri oqytyldy», - dep habarlady Densaýlyq saqtaý mınıstrligi.