Endi jyl saıyn О́zbekstanda Áıteke bı kúni atalyp ótýi múmkin, dep habarlaıdy Egemen.kz «Habar 24» arnasyna silteme jasap.
Kórshi elge barǵan qazaqstandyq delegasııa osyndaı usynys jasady. Bul bastama jergilikti bılik tarapynan qoldaý tapty. Mádenıet jáne sport mınıstrligi, «Qazaqtýrızm», Qazaqstan musylmandary dinı basqarmasynyń ókilderi jáne týrıstik operatorlar Naýaı oblysyna baryp, baba rýhyna taǵzym etti.
О́zbekstannyń Naýaı oblysynda 40 myń qazaq tamyryn tereńge jaıyp, urpaq órbitip otyr. Tili men dilin saqtap, dástúrin berik ustanǵan qandastarymyz bul.
Bul óńirde Kishi júzdiń bas bıi Áıteke babamyzdyń súıegi jatyr. Biraq oraq aýyz, ot tildi sheshenniń máńgilik mekeni osynda ekenin kóp qazaqstandyq bile bermeıtin kórinedi.
Bektemir Ysqaqov, QMDB janyndaǵy qajylyq kompanııanyń dırektory:
– Osynda Áıteke bı babamyz jatqanyn kóp adam bile bermeıdi. Osy babalarymyzdyń rýhyna taǵzym etip, olarǵa duǵa jasap, óskeleń urpaqqa tanytyp, olardyń ónegeli ómirin dáripteý – bizdiń mindetimiz. Kishi júzge tóbe bı bolyp tórde otyrǵan babamyzdy dáripteý úshin irgedegi kórshiler septesýge daıyn ekenin jetkizdi. Bul oraıda jergilikti bılik Áıteke bı týraly beınerolıkterdi qarjylandyrýǵa ázir. Qazaqstannan týrıster kóptep kelse, budan ala taqııaly aǵaıyn da utady.
Javlon Hasanov, Naýaı oblysy Týrızmdi damytý basqarmasynyń basshysy:
– О́kinishke qaraı, pandemııanyń saldarynan týrızm turalap qalǵanyn bilesizder. Áıtpese Qazaqstannan keletin týrısterdiń sany 2019 jyly 80 prosent ósip, 12 myń adamdy qurady. Endi biz qazaqstandyq áriptesterimizben tájirıbe almasyp, týrızm salasyna ınvestısııa tartyp, týrbıznes arasyndaǵy ózara yntymaqtastyqty damytýǵa kelisip otyrmyz.
Ol úshin elimizdiń Mádenıet jáne sport mınıstrligi men Naýaı oblysynyń ákimdigi týrızm salasyndaǵy yntymaqtastyq jónindegi memorandýmǵa qol qoıyp, salany birlese damytýǵa ýaǵdalasty. «Qos memleket týrızm ındýstrııasyndaǵy bir-biriniń joǵyn túgendeı alady», deıdi mamandar.
Bektemir Ysqaqov, QMDB janyndaǵy qajylyq kompanııanyń dırektory:
– Otyrarda Arystan bab babamyz bar. Olar da О́zbekstan halqyna qyzyǵýshylyq týǵyzady. О́zbekstan halqynyń týrısteri de Qoja Ahmet Iаssaýı babamyzdyń basyna baryp, duǵa jasap jatady.
Lázzat Ahanova, «О́zbekstan» týrıstik brendiniń Qazaqstandaǵy qurmetti elshisi:
– Naýaı oblysynyń ákimdigine Áıteke bıdiń týǵan kúnin jyl saıyn atap óteıik dep usyndyq. 23 naýryzda eken. Naýryzdyń kezinde úsh kúndik festıval ótkizetin bolsaq, kóp qazaqstandyqqa qyzyq bolady dep oılaımyn. Árıne, biz de osynda kelip, óz jerimizdi aıtyp, О́zbekstan azamattaryna bizdiń jerimizde qandaı qyzyq nárseler bar, sol jaqqa biz de shaqyryp otyramyz. Naýaıde qazaq pen qaraqalpaqtyń mádenıeti toǵysqan Kenımeh deıtin jer bar. Qazir oblys hákimi osy jerde sáýir aıynda eki el jastaryn biriktirip, halyqaralyq festıval ótkizýdi usynyp otyr. О́zbek jerinde topyraq buıyrǵan aǵaıynnyń oshaǵy sónbeı, kógerip-kóktegenin kórsin, Áıteke bıdeı babamyzdyń rýhyna taǵzym etsin nıetpen.