Búgin elimizde vaksınalaý bastalady

Jalpy, aqpan aıynda Qaraǵandy farmasevtıkalyq kesheni vaksınanyń 112 myń dozasyn, naýryzda – 150 myń, sáýirden maýsymǵa deıin aı saıyn 600 myń dozany jetkizedi. Sondaı-aq sáýir aıynan bastap 75 myń doza kóleminde QazCovid-in otandyq vaksınasy salynady dep josparlanýda,  aı saıyn onyń kólemi 500 myń dozaǵa kóbeıedi. Birinshi kezekte halyqtyń jekelegen toptary – medısına qyzmetkerleri, polıseıler, áskerı qyzmetkerler jáne t. b. vaksınalanady.

Vaksınalaýǵa profılaktı­kalyq egýge qarsy kórsetkishteri joq adamdar jiberiledi. Vak­sınalaý aldynda dáriger pa­sıentti mindetti túrde tek­seredi. El boıynsha egý pýnkt­teriniń daıyndyǵy tekserildi, profılaktıkalyq egý júrgizý máseleleri boıynsha standartty operasııalyq rásimder bekitildi, 2 myńnan astam medısına qyzmetkeri oqytyldy. Aıta ketý kerek, tek vaksınalaý koronavırýstyń odan ári taralýyna jol bermeıdi. Bul jóninde Densaýlyq saqtaý mınıstrligi Ulttyq qoǵamdyq densaýlyq saqtaý ortalyǵy Sa­nıtarlyq-epıdemıologııalyq sa­­raptama jáne monıtorıng ǵy­lymı-praktıkalyq ortalyǵy dırektorynyń orynbasary Manar Smaǵul aıtyp berdi.

«Vaksınalaý – eń tıimdi sharalardyń biri. Tek vaksına ólim-jitim men ınfeksııanyń taralýyn azaıta alady. Vaksına arqyly erkindikke qol jetkizemiz. Buǵan deıin de aıtqanymdaı, shekteýlerdi azaıtýǵa bolady. Bálkim kúzde maskany sheshetin shyǵarmyz. Onyń ústine kúzde balalardy mektepke qaıtarý múmkindigi talqylanyp jatyr. Onlaın emes, oflaın kezdesýler ótkizerimizge úmittenemin», dedi M.Smaǵul.

Onyń aıtýynsha, halyqty ashyq habardar etý qajet. Barlyq derek pen aqparatty senimdi kózderden jáne quzyretti mamandardan alý kerek.

«Sebebi qazir áleýmettik je­lide vaksınalaýǵa qatysy joq eki-úsh jyl burynǵy beınelerdi, fotolardy baıqaımyz. Tek senimdi aqparatqa súıený kerek. Reseılik «Spýtnık V» vaksınasyna kelsek, reseılik áriptester qyzarý, temperatýranyń joǵarylaýy túrinde asqynýlar bolady deıdi, olar birneshe kúnnen keıin ketedi. Qorytyndylaı aıtqanda, vaksınanyń paıdasy kóp, óıtkeni ol bizdi aýrýdan qorǵaıdy», dedi M.Smaǵul.

Sonymen qatar Qoǵamdyq densaýlyq saqtaý ulttyq or­talyǵynyń ǵylymı keńesshisi Álim Ákimbaev qazaqstandyq QazCovid-in vaksınasynyń artyqshylyqtaryn aıtyp berdi.

«Biz qazir úlken joldy eńserdik. Endigi mańyzdy kezeń – vaksınalaýdy qoldaný. Vaksına alyndy, endi vaksınalaýdy durys uıymdastyrý kerek. Maska rejimi men qashyqtyq talaby áli de saqtalady. Ásirese juqpaly aýrýlar aýrýhanalarynyń dá­rigerlerin, epıdemııalyq qyz­metti, naýqastarmen eń kóp baılanysta bolatyn adamdardy ımmýndaý qajet. Reseı birinshi kezeńde bizge óte joǵary álemdik reıtıngke ıe «Spýtnık V» vaksınasyn usyndy. Jaqyn arada bizdiń otandyq vaksına da shyǵarylýy tıis», dep atap ótti Á.Ákimbaev.

Sarapshynyń ózi qazaqstandyq vaksınaǵa basymdyq berip otyrǵanyn aıtty.

«Patrıot retinde emes, vaksınalaýmen aınalysqan maman retinde qazaqstandyq vaksınaǵa kóbirek mán beremin dep aıta alamyn. Nege? Jasalýy jaǵynan bul – óltirilgen, belsendi emes vaksına. Ol saqtaý jáne tasymaldaýdyń ar­naıy temperatýrasyn qajet etpeıdi. Mundaǵy rejim ekiden segiz gradýsqa deıin. Iаǵnı vaksınany saqtaý úshin qarapaıym turmystyq tońazytqyshty da qoldanýǵa bolady. Mundaı tizbek Qazaqstanda ortalyqtan shalǵaı óńirge deıin qolǵa alynǵan. Sondyqtan 20 gradýs temperatýrada saqtaýdy talap etetin reseılik vaksınadan tıimdi bolyp tur. О́ıtkeni mundaı temperatýrada únemi saqtaý qoldan kelmeýi múmkin. Al temperatýra talabyn buzý sapanyń tómendeýine yqpal etedi», dep túsindirdi maman.

Sonymen birge Á.Ákimbaev qazaqstandyq vaksınanyń an­tıgendik jıyntyq spektri shek­telmegenin jetkizdi. О́ıtkeni tutas jasýsha alynyp, qandaı da bir ádispen óltiriledi jáne antıgenderdiń tolyq jıyntyǵy saqtalady.

«Qazir bul óte ózekti, sebebi koronavırýs ınfeksııasy týraly jańa stereotıpter shyǵyp jatyr. Bul vaksına koronavırýstyń barlyq mýtantty túrlerine ımmýnıtetti qalyptastyrýy kerek. Mine, osy turǵyda qa­zaqstandyq vaksınanyń perspektıvasy bar», dep túıindedi sarapshy.