Kaspııdiń qazaqstandyq bóligi 15 teńiz mılin quraıtyn bolady. Búgin senatorlar osy zańdy qabyldady, dep habarlaıdy Egemen.kz Senattyń baspasóz qyzmetine silteme jasap.
Qujatta brakonerlermen kúresýdiń normalary jazylǵan, alaıda óz isine adal balyqshylarǵa qorqýdyń qajeti joq. Kerisinshe, balyqshylardyń jaǵdaıy jaqsardy. Eger buryn qazaqstandyq kemeler teńizge kúndiz ǵana shyǵa alǵan bolsa, endi jańa túzetýlerge sáıkes táýliktiń kez kelgen ýaqytynda balyq aýlaýǵa múmkindik bar.
«Konvensııanyń negizinde tıisti zańdarǵa eni 15 teńiz mılin quraıtyn aýmaqtyq sýlar týraly norma engiziledi. Olardyń syrtqy shegi memlekettik shekara mártebesine ıe bolady. Aýmaqtyq sýlarǵa 10 mıldik balyq aýlaý aımaqtary qosylady. Onda ár memleket balyq aýlaý boıynsha aıryqsha quqyqtarǵa ıe. Qabyldanǵan zań memlekettik shekarany berik qorǵaýǵa, memleketimizdiń qaýipsizdigin qamtamasyz etýge jáne Kaspııde elimizdiń ekonomıkalyq múddesin júzege asyrýǵa quqyqtyq negiz qalyptastyrady. Sondaı-aq zańnyń birqatar normasy sý bıologııalyq resýrstaryn saqtaýǵa baǵyttalǵan. Jańa normalar bizdiń ulttyq múddemizge saı keletini sózsiz», dedi Senat tóraǵasy Máýlen Áshimbaev.
Senat Tóraǵasy Máýlen Áshimbaevtyń aıtýynsha, búgin qabyldanǵan Zań ekonomıkalyq qyzmetti jáne Kaspıı teńizindegi memlekettik shekarany qorǵaýdyń quqyqtyq bazasyn jaqsartýǵa múmkindik beredi. Qujat 2018 jyly qabyldanǵan Ulttyq zańnamany, Tuńǵysh Prezıdent - Elbasynyń bastamasymen qabyldanǵan Kaspıı teńiziniń quqyqtyq mártebesi týraly konvensııamen úılestirýge baǵyttalǵan.
«Zań jobasy birikken seriktestik áreketterge qajetti quqyqtyq negiz qalyptastyrady, sonyń ishinde ekologııa jáne Kaspııdiń bıoresýrstaryn saqtaý, brakonerlikpen, sonymen qatar terrorızmmen kúres jáne Kaspıı teńizindegi qaqtyǵystardyń aldyn alýdaǵy ózara baılanysta mańyzy zor», dedi Senat depýtaty Nurjan Nursıpatov.