Halyqty ımmýndaýmen qamtý úshin Qazaqstanda vaksınalar men resýrstar jetkilikti me? Sáýir aıynda dárigerler, polıseıler, muǵalimder jáne stýdentterden keıin naýqandy kezeń-kezeńmen júzege asyrýǵa sáıkes, qarapaıym azamattarǵa vaksınasııa jasalady. Aldyńǵy sheptegi qyzmetkerlerge ekpe salý sátti júrgizilse, erikti negizde vırýstan tegin «qorǵanysty» paıdalanǵysy keletin adamdar kóp bolady. Mysaly, 2 mıllıon adam. Vedomstvo qandaı sharalar qabyldaıdy?
Bul suraqqa Densaýlyq saqtaý vıse-mınıstri Ajar Ǵınııat jaýap berdi. Onyń aıtýynsha, aýqymdy sharalar qolǵa alynady.
«Ondaı múmkindik bar, barlyq emhanalarda egý kabınetteri jetkilikti. Eger ol az bolsa, keńeıtemiz. Basqa medısınalyq uıymdarda sanıtarlyq-epıdemıologııalyq rejımdi saqtaı otyryp, qolaıly jaǵdaı jasalatyn bolady. Bul qoldaný úshin kelip túsetin vaksınalardyń sanyna baılanysty», - dep sendirdi Ǵınııat.
Al onyń áriptesi, elimizdiń bas sanıtarlyq dárigeri Erlan Qııasov jappaı ımmýndaý kezinde 750 myń vaksına dozasyn jetkizý josparlanǵanyn habarlady. Onyń aıtýynsha, bul jetkilikti bolady. Onyń ústine, jetkizý de, vaksınasııa da kezeń-kezeńmen júzege asyrylady.
Ol sondaı-aq jýrnalıster táýekel topqa jatqyzylatynyn atap ótti. Olardy vaksınasııalaý ımmýndaý júrgizýdiń tıisti kezeńinde qarastyrylǵan.
Qazaqstanda turatyn sheteldikterge keletin bolsaq, olar vaksınany tegin ala ma, joq pa, ázirge belgisiz.