«Qazaqstan Respýblıkasyndaǵy úkimettik emes uıymdarǵa arnalǵan memlekettik áleýmettik tapsyrys, granttar jáne syılyqaqylar týraly» zańǵa ózgerister men tolyqtyrýlar engizýdi talqylaý boıynsha jumys tobynyń birinshi otyrysy ótti, dep habarlaıdy Egemen.kz.
Jumys tobynyń quramyna azamattyq qoǵam salasyndaǵy sarapshylar, ÚEU, halyqaralyq uıymdardyń basshylary jáne memlekettik organdardyń ókilderi kiredi.
Aqparat jáne qoǵamdyq damý mınıstrligi granttyq mehanızmniń transparenttiligin arttyrý, mejelengen granttar júıesin engizý jáne tıimdilikti baǵalaý bóliginde zańnamany jetildirý boıynsha negizgi tásilderdi tanystyrdy.
Birinshi otyrysta granttyq jobalardy qalyptastyrý mehanızminiń máseleleri talqylandy.
Zań jobasyn ázirleýshiler ÚEU-dan, azamattar men sarapshylardan usynystar jınaý, qajettilikterdi taldaý jáne áleýmettik zertteýlerdiń nátıjeleri negizinde problemalardy saralaý arqyly granttardy «tómennen joǵaryǵa qaraı» qaǵıdaty boıynsha qalyptastyrýdy qamtamasyz etýdi usynady.
Sondaı-aq Azamattyq bastamalardy qoldaý ortalyǵynyń (ABQO) saıtynda granttar baǵyttaryn jarııa talqylaý jáne ýákiletti organ janyndaǵy ÚEU-men ózara is-qımyl jónindegi úılestirý keńesiniń, osyǵan uqsas óńirlik ÚEU keńesteri men qoǵamdyq keńesterdiń otyrystarynda talqylaý usynyldy.
Talqylaý barysynda Qazaqstannyń Azamattyq alıansynyń prezıdenti Baný Nurǵazıeva granttyq qarjylandyrý mehanızmderin jeńildetý jáne azamattyq bastamalarǵa basymdyq berý qajettigin atap ótti. Onyń aıtýynsha, granttyq jobalardyń basty mindeti –jumystyń nátıjesi men sapaly oryndalýy.
О́z kezeginde «Ortalyq Azııanyń Eýrazııa qory» korporatıvtik qorynyń atqarýshy dırektory Rınad Temirbekov tapsyrys berýshi tek taqyryp pen maqsatty aıqyndap, problemalardy sheshý tetikterin ÚEU usynǵan kezde granttarǵa degen kózqarasty ózgertý qajet ekendigine basa nazar aýdardy. Sondaı-aq R.Temirbekov ABQO ÚEU men azamattardyń usynystaryn zerdeleý boıynsha ádistemelik jáne taldaý jumystaryn júrgizetin ÚEU úshin resýrstyq ortalyq rólin atqarýy tıis ekenin atap ótti.
Qaraǵandy oblysynyń Azamattyq alıansynyń basshysy Gúlnar Qurbanbaeva granttyq jobalardy josparlaý boıynsha naqty usynystar engizdi.
Talqylaý barysynda qoǵam ókilderinen kóptegen usynystar men pikirler tústi.