SQO-da 5 kún ishinde kólik basqarý quqyǵynan aıyrylǵan úsh mas júrgizýshi ustaldy, dep habarlaıdy Egemen.kz Polisia.kz-ke silteme jasap.
4 aqpanǵa qaraǵan túni Petropavl qalasynyń patrýldik polıseıleri Trýd kóshesinde “VAZ 2114” avtokóligin toqtatqan. Tekserý barysynda 33 jastaǵy júrgizýshiniń buryn masań kúıde kólik basqarǵany úshin úsh jyl merzimge kólik basqarý quqyǵynan aıyrylǵany belgili boldy.
Medısınalyq kýálandyrý nátıjesi onyń taǵy da alkogoldik masań kúıde ekendigin kórsetti. Kólik salonynda jolaýshy bolǵan. Er adamdar ortaq tanystarymen ishimdik ishkendigin túsindirdi.
Atalǵan fakt QR Qylmystyq kodeksiniń 346-baby (Kólik quraldaryn basqarý quqyǵynan aıyrylǵan, alkogoldik, esirtkilik jáne (nemese) ýytqumarlyq masań kúıdegi adamnyń kólik quralyn basqarýy, sol sııaqty kólik quralyn osyndaı adamnyń basqarýyna berý nemese kólik quralyn osyndaı adamnyń basqarýyna jol berý) boıynsha Sotqa deıingi tergep-tekserýlerdiń biryńǵaı tizilimine engizildi.
– Bundaı jaǵdaılar sırek emes. Oblys ortalyǵy men M.Jumabaev aýdanynda qańtardyń 30-ynan bastap osyǵan uqsas taǵy eki fakt anyqtaldy. Zań talaptaryn elemeýge jol berilmeıdi. Patrýldik polıseıler osyndaı faktilerdi anyqtaý boıynsha reıdtik is-sharalardy turaqty túrde júrgizedi, – deıdi SQO PD Jergilikti polısııa qyzmeti basqarmasynyń bastyǵy Aıdyn Baımatov.
Basqarý quqyǵynan aıyrylsa da, kólik tizgindep júrgen adamdarǵa aıyppul salynady nemese bas bostandyǵyn shekteý, sondaı-aq ómir boıy júrgizý quqyǵynan aıyrý jazasy qoldanylady.
О́tken jyly polıseıler kólik basqarý quqyǵynan aıyrylǵan 72 mas júrgizýshige qatysty materıaldardy sotqa tapsyrǵan. Olardyń 65-ine qatysty sot sheshimi shyǵaryldy. Tórteýiniń kólik basqarý quqyǵy úsh jyl merzimge shekteldi. Al 61 júrgizýshi kólik quraldaryn basqarý quqyǵynan ómir boıyna aıyryldy.Aqparat kózi Polisia.kz saıtynda: https://polisia.kz/sqo-politsejleri-5-kun-ishinde-kolik-basqaru-quqyghynan-ajyrylghan-ush-mas-zhurgizushini-ustady/