Jambyl oblysy Qordaı aýdanyndaǵy Otar stansııasynda «Shý-Almaty» baǵytyndaǵy №2534 júk poıyzynyń 10 platformasy relsten shyǵyp ketti, dep habarlaıdy Egemen.kz oblystyq Tótenshe jaǵdaı departamentiniń baspasóz qyzmetine silteme jasap.
«Jambyl oblysy Qordaı aýdanynda «Bel-Ańyraqaı» aralyǵynyń 3858-shaqyrymynda «Shý-Almaty» qatynasyndaǵy № 2534 júk poıyzynyń 10 bos platformasy (barlyǵy 54 bos platforma bolǵan) relsten shyǵyp ketti, onyń 7-eýi búıirine aýdaryldy, 3-eýi relsten taıdy», - delingen vedomstvo habarlamasynda.
Oqıǵa saldarynan Otar stansııasynda jolaýshylar poıyzdarynyń kidirisi oryn aldy.
Atap aıtqanda:
- «Almaty-Nur-Sultan» baǵytyndaǵy № 3 jolaýshylar poıyzy 4 saǵat 45 mınýtqa (167 jolaýshy, onyń ishinde 3 bala, 18 vagon);
- «Almaty-Petropavl» baǵytyndaǵy № 15 jolaýshylar poıyzy 2 saǵat 37 mınýtqa (445 jolaýshy, onyń ishinde 43 bala, 16 vagon);
- «Almaty-Atyraý» baǵytyndaǵy № 41 jolaýshylar poıyzy 1 saǵatqa (227 jolaýshy, onyń ishinde 1 bala, 17 vagon);
- «Almaty-Qostanaı» baǵytyndaǵy № 43 jolaýshylar poıyzy 30 mınýtqa (200 jolaýshy, onyń ishinde 1 bala, 19 vagon) keshiktirildi.
«Tótenshe jaǵdaıdan qaza bolǵandar men zardap shekkender bolǵan joq. Saǵat 20.00-de TJD-nyń jedel jeli nomeri iske qosyldy. Otar beketinde Jedel medısınalyq kómek aýrýhanasy kezekshilik atqarýda. Saǵat 21.30-da taq joldaǵy jolaýshylar poıyzdarynyń qozǵalysy qalpyna keltirildi. Jóndeý-qalpyna keltirý jumystary «QTJ» UK» AQ kúshimen júrgizilýde. Oǵan 50 qyzmetker, 6 birlik tehnıka jáne Shý men Almaty stansııalaryndaǵy 2 qalpyna keltirý poıyzy jumyldyrylǵan», - deıdi TJD baspasóz qyzmeti