Shymkent qalasynda 1 naýryzdan bastap «Ozim Scooters» kompanııasy ákimdik pen birlese skýter-sherıng jobasyn iske qosýdy josparlap otyr.
Bul joba álemdik deńgeıde keńinen taralyp keledi. Búginde Orta Azııadaǵy elder ishinde tek Qazaqstanda ǵana júzege asyrylýda. Buǵan deıin atalǵan joba Almaty qalasynda iske qosylǵan bolatyn.
Jobany júzege asyrý úshin qalaǵa 127 mln.teńgeden astam ınvestısııa tartylyp otyr. Sondaı-aq turaqty 20 jumys orny ashylmaq.
Búgingi kúni skýterlerge jyldam qyzmet kórsetý úshin qala ortalyǵynan tehnıkalyq baza daıyndaldy.
Elektrskýterdi aldyn ala jaldaý baǵasy 1 mınýtyna 30 teńgeni quraıdy, sondaı – aq abonementter-aptalyq jáne aılyq bolyp qarastyrylǵan.
Birinshi kezeńde 300 skýterdi iske qosý josparlanýda jáne qalanyń ártúrli bólikterinde ornalasqan 30 beket ashylady.
Qaýipsizdikti saqtaý maqsatynda skýterlerdiń jyldamdyǵy saǵatyna 25 km deıin shektelgen.
Ekologııalyq taza - barlyq skýterler batareıamen jumys jasaıtyn elektr qozǵaltqyshtarymen jabdyqtalǵan.
Qyzmetti paıdalaný úshin sizge OZIM mobıldi qosymshasyna tirkelý qajet. Ol úshin eń aldymen App Store nemese Play Market -ten qosymshany júktep alý qajet.
Tirkelý úshin jeke basyn kýálandyratyn qujattyń aldyńǵy jaǵyn sýretke túsirý kerek, sonymen birge qujatpen birge sýretke túsý (selfı) qajet.
Aıta keteıik, skýterlerdi 18 jasqa tolmaǵan adamdarǵa paıdalanýǵa tyıym salynady. Eger tekserý kezinde qoldanýshynyń kámelet jasqa tolmaǵany anyqtalsa, onda bul qoldanýshy buǵattalady.