Basqa basylymdardan:
Italııa senaty ótken aptada jasaqtalǵan Marıo Dragıdiń úkimetin qoldap, oǵan senim bildirdi. Jańa saılanǵan úkimet basshysynyń komandasyn 262 depýtat qoldasa, 40 senator qarsy daýys berdi.
Italııa prezıdenti Serdjıo Mattarela eldegi densaýlyq saqtaý salasyndaǵy jáne ekonomıkalyq daǵdarysty retke keltirý úshin jańa úkimet qurylýy qajet ekenin habarlaǵan-dy. Italııada qańtar aıynda koalısııalyq úkimetke kiretin «Tiri Italııa» partııasy Djýzep Konte basqarǵan úkimetti synǵa alyp, úkimettegi qyzmetterinen bas tartqan edi. Sonyń sebebinen saıası daǵdarys bastalyp, prezıdent Serdjıo Mattarella Eýropalyq ortalyq banktiń burynǵy basshysy Marıo Dragıge úkimetti jasaqtaýǵa usynǵan edi.
Italııa konstıtýsııasyna sáıkes, jańadan jasaqtalǵan úkimet parlamenttiń senimin alýǵa mindetti. Eldegi BAQ Dragı komandasy kishi palatanyń da qoldaýyn ıelenedi degen boljam aıtady. О́ıtkeni ol eldegi barlyq saıası toptardyń kóńilinen shyqqan. Degenmen parlamenttiń kishi palatasynyń daýys berýi búgin ótedi. Jalpy, Italııa halqynyń da saıasatkerge degen kózqarasy jaqsy. Ol el ishinde tehnokratııalyq ıdeıalarymen tanylǵan, el birligin nyǵaıtý kózqarasyn ustanady. Eýropalyq ortalyq banktiń basshysy qyzmetinde eýro baǵamynyń turaqty bolýyn qamtamasyz ete alýy da onyń bilikti basshy ekenin aıqyn dáleldedi.
Úkimet basshysy retinde eldegi túrli saıası partııalardy biriktirip, olardy pandemııaǵa qarsy kúres, ekonomıkany qaıta túletý jolynda ıyq tiresip jumys isteýge shaqyrdy. Senat aldynda 50 mınýt málimdeme jasap, qorshaǵan ortaǵa nazar salatyn, reformalardy sıfrlandyrýǵa baǵyttaıtyn kez kelgenin aıtty. «Birlik – sezim emes, mindet. Al bul mindet bárimizdi biriktiretin bir faktorǵa baılanysty. Ol – Italııaǵa degen mahabbat», dedi premer-mınıstr senatorlardyń aldynda.
Bir qyzyǵy, onyń jospary eldegi solshyldar men oń qanattaǵylarǵa qatar unady. Demokratııalyq partııanyń kóshbasshysy Nıkola Zıngarettı ıtalııalyqtarǵa «halyq tizgini bilikti mamannyń qolynda» dedi. Oń qanattyń jetekshisi Matteo Salvını óz qoldaýyn Dragıge jaqsy densaýlyq saqtaý júıesi, salyq pen qoǵamdyq qyzmetti qysqartý kerektigi týraly usynystarymen bildirdi.
Iri áýe kompanııalary da japa shekti
Air France pen KLM jahandyq pandemııa saldarynan 7,1 mlrd eýro kóleminde kiristen qaǵyldy.
Áýe kompanııalarynyń aqparatyna súıensek, 2020 jyly fransııalyq jáne nıderlandyq tasymaldaýshylardyń tutynýshylary 67 paıyzǵa qysqarǵan. Al túsetin qarjy kólemi 2019 jylmen salystyrǵanda 59 paıyzǵa azaıǵan.
Kompanııalardyń basshysy Benjamın Smıt «2020 jyly eki kompanııa buǵan deıin áýe tasymaly ındýstrııasy bastan keshpegen daǵdarysqa ushyrady», dedi. Sonymen birge basshy eki kompanııaǵa da Fransııa jáne Nıderland úkimeti qoldaý bildirgenin málimdedi.
Fransııa men Nıderland úkimetteriniń Rojdestvodan keıin qaıta ushýǵa ruqsat berýi kompanııalarǵa asa úlken paıda ákelmegeni málim boldy. «2021 jyldy vaksınalaý men shekaralardyń ashylýymen bastadyq», dedi B.Smıt.
MLex naryq analızimen aınalysatyn uıym úkimetterdiń óz eliniń tasymaldaýshylaryna kómektesýge keliskenin habarlady. Uıymnyń Eýroodaqtaǵy ókili Nıkolas Hırst «Biz Eýropa úkimetteriniń áýe kompanııalaryna bóletin mıllıardtaǵan qaryz, qoldaý men granttaryn kórip júrmiz. Álbette bul qarajattyń barlyǵy teń úılestirilmedi», dedi.
Áýe tasymaldaýshylarymen qatar ushaq jasaýshy kompanııalar da shyǵynǵa ushyrady. Máselen, Airbus 2020 jyly 1,1 mlrd eýrodan aıyrylǵanyn málim etti. Kompanııa basshysy Gııom Forı ótken jyldy «biz kútkennen múlde bólek boldy» dep qorytyndylady. «2021 jyl da belgisizdikke toly. Pandemııa áli de qoǵamǵa, adam ómirine, ekonomıkaǵa áserin tıgizip keledi», dedi ol.
2020 jyly kompanııanyń kirisi 49,9 mlrd eýroǵa azaıǵan. 2019 jyly Airbus 70,5 mlrd eýro kóleminde paıda kóripti. Osy sebeppen kompanııa maýsym aıyna qaraı 15 myń qyzmetkerin qysqartatynyn habarlady. Bul mekeme qyzmetkerleriniń 11 paıyzy jumyssyzdar qataryna qosylady degen sóz. Oǵan qosa ushaq jasaýshy kompanııa 2020 jyly tek 566 ushaqtyń jasalǵanyn málimdedi. Al 2019 jyly 768 áýe kemesi daıyndalǵan.