Astana qalasynda 2016-2017 jyldar aralyǵynda jol salynyp, jaramsyz turǵyn úıler retke keltiriledi.Bul týraly «Qazaqstan jańalyqtary» agenttigi habarlady.
Búgin, Prezıdent janyndaǵy ortalyq kommýnıkasııalar qyzmetinde ótkizilgen brıfıngte Astana qalasynyń ákimi Imanǵalı Tasmaǵambetov 2017 jylǵa deıin buzylatyn turǵyn úıdiń ıelerine jańa páter beriletinin málimdedi. Buzylatyn jaramsyz turǵyn úılerdiń kólemi shamamen 150 myń sharshy metr quraıdy eken.
«Jalpy alatyn bolsaq, qala qalyptasqaly beri 12 mln. sharshy metr turǵyn úı salynyp, paıdalanýǵa berildi. Memlekettik qoldaýdyń barlyq tetikteri men baǵdarlamalary boıynsha, 18 myń otbasy nemese 60myń adam jeke úıge qol jetkizgen»,-dep atap ótti sóz oraıynda qala basshysy.Sondaı-aq ol jol-kólik qozǵalysyna qatysty bylaı dedi: «Jeńil relsti kólik (JRK) jobasyn halyqaralyq qarjy uıymdarynyń esebinen júzege asyrý josparlanǵan bolatyn. Atap aıtqanda, Azııa damý banki arqyly qarjylandyrý qarastyryldy. Atalǵan bank ekonomıkalyq jáne áleýmettik tıimdilikter paketin tolyq taldap shyǵyp, joba asa qymbat degen qorytyndy jasady. Mysaly, uzyndyǵy 21,4 shaqyrym bolatyn jeńil relsti kólik jobasynyń birinshi bóligine 250 mlrd. teńge jumsalady eken. Al arnaıy salynǵan joldarmen jyldam júretin baǵyttyq avtobýstar (BRT) jelisiniń osyndaı ýchaskesine 85 mlrd.teńge qarastyrylǵan. Jalpy, osy eki jobanyń baǵa aıyrmashylyǵy 151 mlrd. teńgeni qurap otyr. Sondyqtan sońǵy atalǵan jobanyń birinshi jelisin 2016 jyly aıaqtaý týraly sheshim qabyldandy».
Bul is qala joldaryndaǵy kólik keptelisin boldyrmaý maqsatymen qolǵa alynǵaly otyr. Ol boıynsha atqarylatyn jumystardy tııanaqty atqarý jaýapty tulǵalarǵa tapsyryldy.
Baqytbek Keneshuly.
Derekkóz: «Qazaqstan jańalyqtary» agenttigi
Foto: Yvision.kz