Medısınalyq qyzmetterge arnalǵan tarıfter 2022 jylǵy 1 qańtardan bastap medısına qyzmetkerleriniń jalaqysyn arttyrýdy eskere otyryp, qaıta qaralady. Bul týraly búgin QR Premer-Mınıstriniń orynbasary Eraly Toǵjanovtyń qatysýymen ótken 2020 jylǵy qyzmet qorytyndylary men 2021 jylǵa arnalǵan mindetter boıynsha vedomstvonyń keńeıtilgen alqa otyrysynda Densaýlyq saqtaý mınıstri Alekseı Soı habarlady.
«2022 jylǵy 1 qańtardan bastap jalaqynyń ósýin eskere otyryp, medısınalyq qyzmetterge arnalǵan tarıfter qaıta qaralady, ýnıversıtettik klınıkalar úshin koeffısıentter, sondaı-aq óńirlermen uıymdastyrýshylyq-ádistemelik jumys úshin UO men ǴZI úshin koeffısıentter ázirlenedi», dedi A.Soı.
Sondaı-aq, ol Sovid-19 juqtyrǵan naýqastardy stasıonarda emdeýge jáne jazylyp shyqqandarǵa medısınalyq ońaltý úshin jańa tarıfter kózdelgenin habarlady. Bul tarıfter tósek-kúnderge eseptegende stasıonarlarda emdelý shyǵystaryn tóleý boıynsha jınaqtalǵan derekterdi eskere otyryp, klınıkalyq-shyǵyn toptar qaǵıdaty boıynsha ázirlendi. Sonymen qatar, mobıldi brıgadalarǵa jáne qashyqtyqtan konsýltasııalarǵa tarıfter ázirlendi.
Sonymen qatar, densaýlyq saqtaý mınıstri atap ótkendeı, 2021 jyly mamandandyrylǵan, onyń ishinde joǵary tehnologııalyq, medısınalyq kómek kórsetýge aqy tóleý ádisterin, sondaı-aq onkologııalyq beıindegi emdelip shyqqan jaǵdaılardy tóleý ádisterin jetildirý boıynsha jumys jalǵasady.
Sonymen qatar, alǵashqy medısınalyq-sanıtarlyq kómekke tarıfterdi belgileý bastaldy. Pasıentterdiń jaǵdaıynyń aýyrlyǵyn eskere otyryp, kardıohırýrgııa, mıokard ınfarktisi, ınsýlt, travmatologııalyq jáne ınfeksııalyq aýrýlar boıynsha tarıfterdi pılottyq synaqtan ótkizý josparlanýda.
«2021 jyly densaýlyq saqtaý sýbektileriniń negizgi quraldaryn jańartý maqsatynda biz jol kartasyn iske asyrý jáne 2020-2022 jyldarǵa arnalǵan TMKKK sheńberinde jáne MÁMS júıesinde medısınalyq qyzmetterge tarıf belgileý ádistemesin jetildirý boıynsha jumysty jalǵastyramyz», dedi A.Soı.
Sondaı-aq, densaýlyq saqtaý mınıstrligi jeke qorǵanys quraldaryna arnalǵan shyǵystardy óteý jóninde usynystar ázirleıdi.