Úkimet qaýlysyna sáıkes 19 áleýmettik mańyzy bar azyq-túlik taýarlary bekitilgen. Búginde elimizde birqatar azyq-túlik taýarynyń baǵasy óndirýshiniń ózindik qunynyń artýymen jáne óndiriste paıdalanatyn shıkizat baǵasynyń ósýine baılanysty qymbattaǵan bolatyn, dep habarlaıdy Egemen.kz.
Atap aıtqanda, jumyrtqanyń qymbattaýyna taýyq azyǵynyń orta eseppen 40%-ǵa ósýi áser etip otyr. Osyǵan baılanysty Shymkent qalasynda 1-sanatty jumyrtqanyń baǵasyn turaqtandyrý maqsatynda óńirlik turaqtandyrý qorynan «Shymkent qus» taýar óndirýshisine aınalymǵa qaryz qarajat berilip, óndirýshi kásiporyn jumyrtqa danasyn 31 teńgeden bosatyp, «Gramad» (1. Jibek joly kóshesi, №58; 2. K.Tólemetov kóshesi, №69/42; 3. B.Momyshuly dańǵyly, №6; 4. Á.Jangeldın kóshesi, №3) jáne «Fırkan» (1. Kapal batyr kóshesi, №6/4; 2. Táýke han dańǵyly, №330 «Fırkan Sıtı»; 3. Adyrbekov kóshesi, №117/1; 4. Sh.Ýalıhanov kóshesi, №213 «11 sh/a») saýda jelilerinde 10 danasy 322 teńgeden satylýda.
Al, qumshekerdiń qymbattaýyna RF, Belorýssııa jáne Jambyl oblysyndaǵy qant óndirýshi zaýyttarynyń baǵasy ósýi bolyp tabylady. Atalǵan taýarlardyń baǵasyn turaqtandyrý maqsatynda, «Iýpeks» JShS-ne aınalymǵa qaryz qarajat berilip, 2 000 tonnaǵa jýyq qumsheker qamtamasyz etiletin bolady.
Sondaı-aq, óndiriste paıdalanatyn shıkizattyń (kúnbaǵys tuqymy kóleminiń azaıýy) jáne shıki maıǵa álemdik baǵanyń ósýine baılanysty kúnbaǵys maıynyń baǵasy qymbattap otyr. Osy oraıda kúnbaǵys maıynyń baǵasyn turaqtandyrý maqsatynda kásipkerlik sýbektilerine aınalymǵa qaryz qarajat beriledi. Nátıjesinde 500 myń lıtr kúnbaǵys maıy qamtylatyn bolady. Bul óz kezeginde qala turǵyndarynyń kúnbaǵys maıyn jáne qumshekerdi belgilengen saýda nysandarynda naryq baǵasynan tómen baǵada tutynýǵa múmkindik beredi.
Sonymen qatar, turaqtandyrý qorynyń aınalym mehanızmi boıynsha «Fırkan» jáne «Gramad» saýda jelilerine aınalymǵa qaryz qarajat berilip, atalǵan saýda nysandarynan birqatar áleýmettik mańyzy bar azyq-túlik taýarlaryn belgilengen baǵada satyp alýǵa múmkindik bar.
Birinshi surypty unnan jasalǵan qalypty bólke nan baǵasyn turaqty ustap turý maqsatynda 4 myń tonnaǵa jýyq birinshi surypty un qamtamasyz etiledi.
Odan ózge, baǵa turaqtylyǵyn saqtaý úshin qaladaǵy 4 iri bazar aýmaǵynda jáne tyǵyz ornalasqan aımaqtaǵy 4 orynda «Hermes» JShS-nyń jyljymaly áleýmettik saýda núkteleri uıymdastyrylyp, kókónis ónimderi belgilengen baǵada satylýda.
Qalanyń 4 jerinde azyq-túlik jármeńkeleri turaqty túrde uıymdastyrylyp, tutyný taýarlary naryq baǵasynan 10-15 paıyzǵa tómen baǵada satylyp jatyr.