Aqtaý qalasynyń bas sanıtar dárigeri Ásıma Jarylǵasova turǵyndardy úı jaǵdaıynda óz betinshe dezınseksııa jasamaýǵa shaqyrdy, dep habarlaıdy Egemen.kz.
Oblysynyń qoǵamdyq kommýnıkasııa ortalyǵynda ótken brıfıngte Aqtaý qalasynyń bas sanıtar dárigeri 1, 2, 3-klastaǵy hımııalyq zattarmen tek arnaıy lısenzııasy bar mamandardyń dezınseksııa jasaýyna bolatynyn aıtty. Onyń aıtýynsha jaǵdaıynda óz betinshe 4-sanattaǵy preparattarmen jumys isteýge ruqsat etilgen.
«Jalpy zalasyzdandyrý jumystary mindetti túrde respýblıkalyq reestr tiziminde bar preparattarmen júrgiziledi. Iаǵnı, sol tizimde joq zattardy respýblıka aımaǵynda paıdalanýǵa qatań tyıym salynǵan. Reestr tizimi ınternet jelisinde bar», dedi Á. Jarylǵasova.
Onyń aıtýynsha, jaqynda Aqtaý qalasynyń eki turǵyny hımııalyq ýlanýdan qaıtys bolǵan. Quzyrly organdar anyqtaǵandaı Aqtaý qalasynyń turǵyny «Kvıkfos» preparatymen (jándikterge qarsy preparat) kórshilerin eskertpesten óz páterin dezınseksııalaıdy. Páterin zalalsyzdandyryp bolǵan soń, úıin kilttep basqa shaǵynaýdanǵa ketken. Keıin kórshileriniń densaýlyǵy nasharlaı bastaǵan. Saldarynan kórshi áıel men onyń qyzy kóz jumdy.
Bas sanıtardyń sózine sensek, óńirde jándikterdi ýlaý preparattaryn úı jaǵdaıynda qoldanyp, saldarynan bolǵan qaıǵyly oqıǵa faktileri 2017, 2018, 2019 jyldary tirkelgen.
«Qaladaǵy barlyq turǵyn úılerdiń tazalyǵyna jaýapty mekemelerde zalasyzdandyrýmen aınalysatyn uıymdardyń tizimi bar. Máselen, Aqtaýda tazalaý jumystaryn júrgizýge ruqsaty bar 8 mekeme jumys isteıdi. Qala turǵyndary kez-kelgen ýaqytta arnaıy uıymdardyń qyzmetine júgine alady. Eger úıde zararsyzdandyrý júrgizilse, turǵyndar mindetti túrde ony kórshilerine eskertip, podezge habarlandyrý ilýi qajet. Bul – ýlaný jaǵdaılarynyń aldyn alady», - dedi ol.