Aqtóbe oblysyna kelgen «Parasat joly» respýblıkalyq ortalyǵynyń basshysy, jazýshy, qoǵam qaıratkeri Sádibek Túgel jáne Sybaılas jemqorlyqqa qarsy is-qımyl agenttigi tóraǵasynyń keńesshisi Jazıra Jylqyshıevamen kezdesýinde óńir basshysy Ońdasyn Orazalın sybaılas jemqorlyqqa qarsy belsendi túrde júzege asyrylyp otyrǵan jobalar týraly aıtyp berdi. Qolǵa alynǵan jobalardyń ishinde óńirdegi 233 memlekettik kitaphana aıasynda qolǵa alynǵan «Parasat joly» ortalyqtarynyń mańyzy zor dep habarlaıdy Egemen.kz
Oblystyq sybaılas jemqorlyqqa qarsy is-qımyl qyzmeti men mádenıet basqarmasy arasyndaǵy memorandýmǵa sáıkes jumysyn bastaǵan «Parasat joly» ortalyqtarynda sybaılas jemqorlyqqa qarsy turý qaǵıdalaryn qalyptastyrý máseleleri turǵyndarmen jıi-jıi talqylana bastady. Sonyń ishinde jan-jaqtan keletin qoǵam qaıratkerleri, shyǵarmashylyq ókilderi men ǵalymdar, mádenıet qyzmetkerleri kitaphanalarda ár túrli top ókilderimen jıi-jıi kezdesip, aqparattyq-aǵartý jumystaryn júıeli túrde júrgizip keledi. Mundaı kezdesýlerde azamattardyń jas kezden bastap sybaılas jemqorlyqqa tózbeýshilik ustanymdaryn qalyptastyrý men adamı- tulǵalyq mádenıetterin jetildirý máseleleri jan-jaqty talqylanady.
О́ńir basshysy Ońdasyn Orazalın qoǵamda azamattardyń parasattylyq, adaldyq qaǵıdalaryn ilgeriletetin «Parasat joly» jobasynyń rýhanı ortalyqtar–kitaphanalarda qolǵa alynýynyń artyqshylyqtaryna erekshe toqtaldy. Osy joba sheńberinde qala, aýdan jáne aýyl kitaphanalary sybaılas jemqorlyqqa tózbeýshilik qaǵıdattaryn júıeli túrde qalyptastyratyn ortalyqtarǵa aınalmaqshy.