Keshe Germanııanyń Keln qalasynda boksshylardyń halyqaralyq týrnıri óz máresine jetti. Fınalda Qazaqstannyń alty boksshysy óner kórsetkenimen, olardyń ekeýine ǵana bas júlde buıyrdy, dep habarlaıdy Egemen.kz
91 kılo salmaqta óner kórsetken Aıbek Oralbaı komanda qorjynyna alǵashqy altyndy salsa, +91 kılo salmaq dárejesinde kúsh synasqan Qamshybek Qonqabaev ta qarsylas shaq keltirgen joq. Osylaısha, alyptarmen aıqasyn júrgen nar tulǵaly qos sańlaq nemis jerinde Qazaq eliniń ánuranyn shyrqatty. Jarys jeńimpazy atanǵan qos qandasymyzdyń óneri álemniń ár qıyrynan jınalǵan maıtalman mamandar men jergilikti jankúıerler tarapynan óte joǵary baǵalandy.
Dál sondaı qurmetke bólenýge Sáken Bıbosynov (52 kılo), Orazbek Asylqulov (57 kılo), Ertýǵan Zeınýlınov (63 kılo) jáne Nurbek Oralbaıdyń da (81 kılo) tamasha múmkindigi boldy. Alaıda aıtýly bylǵary qolǵap sheberleri aqtyq synǵa deıin alqynbaı jetkenderimen, sheshýshi tusta utylyp, kúmis medaldi qanaǵat tutty.
Kelndegi dástúrli halyqaralyq týrnırdiń qorytyndysy boıynsha Qazaqstannyń ulttyq quramasy jalpy komandalyq esepte birinshi oryndy ıelendi.