Qyzylqoǵa aýdany ákiminiń orynbasary Jaras Esenǵalıevtyń málim etýinshe, 23-25 naýryzda qalyń qar erip, jańbyrdyń tolassyz jaýýynan Mııaly, Saǵyz, Jangeldın, Oıyl, Kózdiǵara, Jambyl, Qyzylqoǵa aýyldyq okrýgterindegi keıbir kóshelerdi sý basqan. Al, Noǵaıty ózeni arnasynan asyp, qarǵyn sý Saǵyz eldi mekeniniń mańyndaǵy kópirdi buzyp ketti, dep habarlaıdy Egemen.kz.
«Tabıǵı sıpattaǵy tótenshe jaǵdaıdy joıý maqsatynda aýdan ákiminiń ókimimen arnaıy jedel shtab quryldy. Qazir kezekshilik uıymdastyrylyp, jedel shtab aýdandaǵy kúshtik qurylymdar men tehnıkalar jumyldyryldy. Turǵyn úılerdiń aýlasyna jınalǵan sýdy arnaıy tehnıkalarmen sorý jumystary júrgizilýde. Qaýip tónip turǵan turǵyn úılerdiń aınalasyna topyraq salynǵan qapshyqtarmen bógetter qoıylyp jatyr» deıdi Jaras Esenǵalıev.
Oblystyq tótenshe jaǵdaılar departamenti baspasóz qyzmeti usynǵan aqparatqa súıensek, 25 naýryzda nóser jańbyrdan keıin Aqtóbe oblysynan bastaý alatyn Noǵaıty ózeninde sý deńgeıi kóterilgen. О́zen arnasy tolyp, «Aqtóbe-Atyraý» jolynyń 341-shi shaqyrymyndaǵy kópirdi sý basqan.
«QazAvtoJol» mekemesiniń merdigeri «Shanhaı Konstrakshn Grýpp KOO LTD» JShS-nen 3 samosval, 2 júk tıegish, 1 ekskavator tartylyp, ýaqytsha salynǵan aınalma kópirge 100 tonna topyraq, 160 tonna qıyrshyq tas tógildi. Kópirge keletin sýdy eki jaǵynan bógeý júrgizildi. Qazir buzylǵan kópirdi qalpyna keltirý jalǵasyp jatyr. Saǵyz eldi mekenindegi 1329 turǵyn úıdi sý basý qaýpi tóngen joq» dep habarlady departamenttiń baspasóz qyzmetinen.