Túrkistan oblysynda polıseıler tabıǵatqa zalal keltirýdiń 31 ákimshilik quqyq buzýshylyǵy men eki ekologııalyq qylmysyn anyqtady, dep habarlaıdy Egemen.kz Polisia.kz saıtyna silteme jasap.
Oblys aýmaǵynda tabıǵat qorǵaý zańnamalaryn buzýdy anyqtaý, aldyn alý jumystaryn jandandyrý maqsatynda arnaıy eki mobıldik top quryldy. Olar oblys aýmaǵyna issaparlarǵa shyǵyp, múddeli mekeme qyzmetkerlerimen birlesken reıdtik sharalar uıymdastyrdy. Osy jumystar nátıjesinde tabıǵatty qorǵaý zańnamalaryn buzǵany úshin eki qylmys, 31 ákimshilik quqyq buzýshylyq anyqtalyp, 200 myń teńgeden astam aıyppul salyndy. Zańsyz balyq aýlaý boıynsha eki qylmysty atap ótsek: Onyń birinde Syrdarııa ózeninde úrmeli qaıyqpen, zańmen tyıym salynǵan elektr toǵyn paıdalanyp, balyq aýlap otyrǵan jerinen eki er adam ustaldy. Quqyq buzýshylardan balyq aýlaýǵa arnalǵan quraldarmen qatar, 94 keliden astam sazan balyǵy tárkilendi. Sondaı-aq kúdikti azamattar maqtaaraldyq turǵyndar bolyp shyqty. Polısııa qyzmetkerleri kúdiktilerdi istiń barlyq mán-jaıyn anyqtaý úshin aýdandyq polısııa bólimine jetkizdi.
Ekinshi jaıtta Shardara sý qoımasynda aý-tor paıdalanyp, temir qaıyqpen zańsyz balyq aýlaýshylar ustaldy. Olardan aıǵaqty zat retinde 200 kelige jýyq balyqtar tárkilendi. Quqyq buzýshylar Shardara APB-ǵa jetkizildi. Atalǵan jaıt QR QK-niń 335-babymen tirkeýge alyndy.
Túrkistan oblysynyń polıseıleri azamattarǵa zańsyz balyq aýlaý, sondaı-aq Qyzyl kitapqa engizilgen janýarlar men ósimdikterdi joıýdyń sońy zań aıasynda jaýapqa tartylýǵa ákep soǵatynyn eske saldy.