Memleket basshysynyń halyqqa arnaǵan Joldaýynda aıtylǵan tapsyrmalardy oryndaý maqsatynda Saýda jáne ıntegrasııa mınıstrligi «Keıbir zańnamalyq aktilerge bırjalyq saýdany damytý jáne jetildirý máseleleri boıynsha ózgerister men tolyqtyrýlar engizý týraly» zań jobasyn ázirledi.
Bul týraly Saýda jáne ıntegrasııa mınıstrliginiń baspasóz qyzmeti habarlady. Jaýapty vedomstvonyń Bırjalyq saýda basqarmasynyń basshysy Maqsat Tursynbekovtiń aıtýynsha, zań jobasy negizgi úsh baǵytqa baılanysty bırjalardy damytýdy kózdeıdi.
«Birinshiden, taýar bırjalarynyń ashyqtyǵyna qoıylatyn talaptar kúsheıtiledi. Ekinshiden, jaǵdaıdy ózgertýge jáne shyn máninde básekelestik orta men bırjalyq saýdany damytý úshin jańa jaǵdaılar jasaýǵa aıtarlyqtaı qadam jasaldy. Úshinshiden, bırjalyq saýda kólemin ulǵaıtý mindeti qoıylyp otyr.
Eger de anyqtap aıtsaq, birinshi baǵytqa sáıkes, jarǵylyq kapıtaldy ulǵaıtý, bırjalyq saýdanyń biryńǵaı qaǵıdalaryn bekitý, taýar bırjalarynyń eki deńgeıli júıesin engizý, taýar bırjalary men bırjalyq saýdaǵa qatysýshylardyń qarjylyq turaqtylyǵy boıynsha talaptardy belgileý kózdelgen», dedi M.Tursynbekov.
Ekinshi baǵyt aıasynda da birqatar shara qarastyrylypty. Mysaly, bırjalyq brokerler men taýar dılerlerine birneshe taýar bırjasyna qatysýǵa tyıym salýdy bir mezgilde alyp tastap, biryńǵaı akkredıtteý talaby belgilenedi. Sondaı-aq, azamattarǵa deldalsyz bir ret keletin klıent retinde bırjalyq saýda-sattyqqa qatysýǵa múmkindik beretin tetikti engizý qarastyrylyp otyr. Taýarlar men saýda-sattyqty seksııalar boıynsha bólý eskeriledi. Budan basqa, ýákiletti organǵa bir saýda sessııasynda lottyń eń joǵary mólsherin belgileý boıynsha ókilettikter beriledi.
«Úshinshi baǵyt – iske asyrylǵan mámileler kólemi men seksııa túrine baılanysty saralanǵan mólsherlemeni ornatýǵa múmkindik berip, bırjada kelisimderdi jasaý men sharttardy oryndaýǵa qatysty saqtandyrý quraly engiziledi», dedi Bırjalyq saýda basqarmasynyń basshysy.
Zańnamaǵa osy tolyqtyrýlardy engizý arqyly bırja saýdasynyń kólemi artyp, onyń ashyqtyǵy qamtamasyz etiledi degen senimde zań jobasynyń avtorlary. «Mańyzdy artyqshylyqtardyń biri – naryqtyń talabyna saı baǵalar belgilenip, jańa áriptesterdi tartýǵa múmkindik beriledi. Bul óz kezeginde básekelestiktiń artýyna áser etedi. Turaqty bırjalyq salany qalyptastyrýdaǵy taǵy bir mańyzdy másele – bırjalyq kelisimsharttardyń ashyqtyǵy. Zań jobasynda bul da eskerilgen», dedi M.Tursynbekov.
Bıyl aqpanda atalǵan zań jobasy Úkimet basshysynyń Keńsesine engizildi. Endi reformalyq qujat Parlamenttiń qos palatasynda qaralatyn kún de alys emes.