Pandemııa qyzmetterdi onlaın usynýǵa májbúr etti. Sóıtip, naryqta tutynýshylar úshin kúrestiń jańa kezeńi bastaldy. Tikeleı qarjy ónimin usynatyn bankter bul báıgege jedel qosylyp, óz fýnksııasyn zaman aǵymyna jyldam yńǵaılaýy tıis edi. Biraq otandyq qarjy ınstıtýttarynyń qımyly shabandaý kórinedi. Árıne, kózge ilinetin keıbir ilgerileýshi faktorlar da joq emes.
Elimizdegi 25 banktiń tórteýi ǵana taýarlar men qyzmetterdi bólip tóleý tólemi arqyly alýǵa múmkindik beretin onlaın-dúken qyzmetin usynyp otyr. Olar – ForteBank, Halyk Bank, Jusan Bank jáne Kaspi.kz. Al 11 ekinshi deńgeıli bankten depozıtti onlaın ashýǵa bolady. Ranking.kz málimeti boıynsha 2020 jyldyń sońynda ınternet-bankıng pen mobıldi qosymshany paıdalanýshylar sany 28,7 mln-ǵa jetken.
Finprom.kz deregi boıynsha 2021 jyldyń alǵashqy eki aıynyń ózinde-aq 7,7 trln teńge onlaın tólengen. Bul 2020 jyldyń dál osy kezeńimen salystyrǵanda eki ese kóp. Sonyń ishinde onlaın tólemderdiń 82 paıyzy mobıldi qosymsha jáne ınternet arqyly júzege asqan. Osydan-aq qolma-qol tólemniń jyl sanap qoldanystan shyǵa bastaǵanyn ańǵarý qıyn emes.
Ár banktiń usynǵan sharttary men qyzmet formaty ártúrli. Máselen, ForteMarket onlaın-dúkeninen taýardy tórt aıdan eki jylǵa deıingi ýaqytqa bólip satyp alýǵa bolady. Bul rette taýar quny 600 myń teńgeden aspaýy kerek. Halyk Market pen Kaspi.kz qosymshalarynda bólip tóleý tek úsh aıǵa belgilengen. Alaıda keıbir satýshylar 12 jáne 24 aıǵa bólýge ruqsat beredi. Jusan Bank klıentteri taýardy úsh aıdan bastap eki jylǵa deıingi ýaqytqa bóle alady. Shekti somasy – 1,5 mln teńge.
Sońǵy ýaqytta birqatar qarjy ınstıtýty túrli klıentterge onlaın qyzmetter usyna bastady. Máselen, «Otbasy bank» zaımdy ishinara merziminen buryn óteýge múmkindik beretin onlaın-ótinish fýnksııasyn iske qosty. ForteBank qyzmetin tutynýshy jeke tulǵalar men zańdy tulǵalar úıden shyqpaı-aq onlaın shot asha alady. «Bul bıznestiń onlaınǵa kóshýin yntalandyryp qana qoımaı, pandemııa kezinde táýekelderdi de azaıtady», deıdi bank. Al Halyk Bank jáne Kaspi.kz marketpleısi arqyly jeke kásipkerlikti tirkeý prosedýrasy engizildi.
2020 jyly bankter jaǵdaıǵa beıimdelip jáne soǵan oraı túrli fýnksııalar qosýǵa áreket jasasa, 2021 jyly onlaın naryqta básekelestik ornap, soǵan saı tutynýshylar úshin de tańdaý erkindigi týyndaıdy degen úmit basym.