Almatydaǵy «Buqar jyraý» turǵyn úı kesheni kúzetshisin myltyqpen atyp jaraqattaǵan kúdikti 17-qabattyń terezesinen sekirip ketti, dep habarlaıdy Egemen.kz.
Búgin túski úshter shamasynda Almatydaǵy «Buqar jyraý Taýers» turǵyn úı kesheniniń kúzetshisi men belgisiz er adamnyń arasynda janjal týyndap, er adam kúzetshige oq atqan. Aıaǵyna oq tıgen kúzetshi aýrýhanaǵa jetkizilgen.
Al oq atqan er adam sol úıdiń 17-qabatyndaǵy óziniń páterine jasyrynyp, otyzǵa jýyq oq jaýdyryp, kelgen polıseılerge ǵımaratty jaratynyn aıtyp, qoqan-loqqy kórsetken. Keıin terezesine túsiniksiz jazý jazylǵan qaǵaz ilip qoıǵan. Polısııa turǵyn úı keshenin qorshap, kúdiktimen kelissóz júrgizýge tyrysqan. Biraq kúdikti dıalogqa barýdan bas tartqan. Osy sarsańnyń sebebinen turǵyn úı kesheniniń turǵyndary 6-7 saǵat boıy páterlerine kire almaǵan. Kýágerlerdiń aıtýynsha er adam buǵan deıin de kórshilerine dórekilik tanytyp kelgen.
Keshki toǵyz jarym shamasynda kúdikti 17-qabattaǵy óz úıiniń terezesinen sekirip ketti.
Osy jaǵdaıǵa baılanysty Almaty qalalyq Polısııa departamentiniń ókilderi oqıǵa ornynda shaǵyn brıfıng ótkizdi.
Polısııanyń málimeti boıynsha ony eshkim terezeden ıtermegen, ol ózi qolyndaǵy qarýymen birge 17-qabattan sekirip ketken.
«Polısııa qarý qoldanǵan joq. Tek dybys shyǵaratyn granatalar ǵana qoldandy. Kúdiktimen kelissóz júrgizýge 6 saǵattaı ýaqyt jumsalǵanmen nátıje bermedi. Aldyn ala boljam boıynsha, kúdikti jasaǵan qylmysy úshin jaýapkershilikten qoryqqan bolýy kerek. Qaza tapqan er adam 1963 jyly týǵan. Polısııa qyzmetkerleri men turǵyndar arasynda zardap shekkender joq», dedi Almaty qalasy Polısııa departamentiniń resmı ókili Saltanat Ázirbek.
Buǵan deıin ol sekirgen kezde «Allahý akbar» dep sekirdi degen aqparat taraǵan bolatyn. Quzyrly organ bul aqparattyń shyndyqqa janaspaıtynyn jetkizdi.
Qazir tergeý amaldary bastalǵan.