Prezıdent janyndaǵy Ortalyq kommýnıkasııalar qyzmeti alańynda «Táýelsizdik urpaqtary» jáne «Profnavıgasııa» jobalarynyń jaıy túsindirildi. Bul týraly brıfıng barysynda Jastar jáne otbasy isteri komıtetiniń tóraǵasy Shahmardan Baımanov habarlady
Joba «Azamattyq bastamalar ortalyǵy» KeAQ memlekettik granty sheńberinde Aqparat jáne qoǵamdyq damý mınıstrliginiń qoldaýymen «Táýelsizdik urpaqtary» jáne «Profnavıgasııa» jobalary iske asyrylýda.
Mınıstrlik ókiliniń aıtýynsha, «Táýelsizdik urpaqtary» jobasynyń maqsaty – Qazaqstan Respýblıkasynyń táýelsizdik jyldarynda jetistikke jetken jas qazaqstandyqtardyń jetistikterin tanymal etý.
«Mınıstrlik tarapynan úkimettik emes uıymdarǵa granttar arqyly qoldaý kórsetiledi. Memleket basshysy 2020 jyly 1 qyrkúıekte Qazaqstan halqyna Joldaýynda Qazaqstan – daryndy jastar mekeni, erteń elimizdiń abyroıyn asyratyn da osy talantty ul-qyzdar, biz olardyń órisin ashyp, qarym-qabiletin shyńdaý úshin múmkindikter jasaýǵa tıispiz degen bolatyn. «Táýelsizdik urpaqtary» jobasynyń maqsaty – táýelsizdik urpaqtarynyń óz salasy boıynsha óz kúshimen, óz bilimimen jetken jetistikterin jastarǵa kórsetý. Jalpy, joba aıasynda kútiletin negizgi nátıje – tanymal qazaqstandyq jastardy ártúrli áleýmettik jelide, messendjerde taratý, beınerolıkter túsirý, kórsetý arqyly, solardyń jetken jetistikterin, olardy úlgi etý», dedi Sh.Baımanov.
Joba aıasynda Qazaqstannyń barlyq óńirinen 500 jastyń eń qyzyqty jáne shabyttandyratyn oqıǵasyn jınaqtap, mektep, kolledj jáne JOO oqýshylaryna onlaın koýchıng-trenıngter, memlekettik bastamalardy ilgeriletýge jáne iske asyrýǵa baǵyttalǵan motıvasııalyq koýchıng-kýrstar uıymdastyrý qarastyrylǵan.
Al «Profnavıgasııa» jobasy qazirgi zamanǵy suranysqa ıe mamandyqtar úshin jastardyń daǵdylary men quzyretterin damytýǵa baǵyttalǵan.
«Qazaqstannyń jańa kásipteri men quzyretteriniń atlasy» platformasy men «EduNavigator» kásiptik baǵdar berý platformasynyń kómegimen joǵary synyp oqýshylarynyń óz bolashaq mamandyǵyn tańdaýǵa múmkindigi bar. Bul týraly joba jetekshisi Saıasat Nurbek málim etti. «Jańa kásipter men quzyretterdiń atlasy – eńbek naryǵyn syndarly túrde ózgertetin negizgi trendterdi tereń taldaýmen, aldaǵy 5-10 jylǵa arnalǵan ulttyq ekonomıkanyń perspektıvaly salalary men kásipteriniń boljamdy kartasy. Ekonomıkanyń negizgi 9 salasy: taý-ken metallýrgııa kesheni, munaı-gaz salasy, aýyl sharýashylyǵy, kólik, tasymaldaý, mashına jasaý, IT jáne kommýnıkasııa, aýylsharýashylyq, týrızm salalary boıynsha 463 mamandyq jazyp shyqtyq, onyń ishinde jańa mamandyqtar, ózgerip jatqan mamandyqtar jáne eńbek naryǵynda suranysyn azaıtqan mamandyqtar bar», dedi Saıasat Nurbek.
Atlastyń qazaq, orys jáne aǵylshyn tilderindegi barlyq materıaly www.enbek.kz/atlas saıtynda usynylǵan. Sonymen qatar «EduNavigator.kz» arnaıy kásiptik baǵalaý platformasy kez kelgen oqýshyǵa JOO, kolledj deńgeıindegi jastarǵa ózin-ózi baǵalap, óziniń daǵdylaryn, daryndaryn, qyzyǵýshylyqtaryn anyqtaýǵa múmkindik beredi. Bul platforma eńbek naryǵyndaǵy mamandyqtar boıynsha naqty ár balaǵa, tulǵaǵa kásibı aqyl-keńes berip, eńbek naryǵy boıynsha tolyq aqparat usynady. «Bul joba bizdiń quraldar arqyly aqparatty paıdaly jáne saralanǵan túrde usynady. Ár mamandyqtyń bolashaǵy, eńbekaqysy, avtomattandyrýǵa ushyraý qaýip-qateri, tapshylyǵy, suranysy týraly tolyq aqparat beredi. Bul jobanyń mańyzdylyǵy – bolashaq eńbek naryǵynyń problemalaryn orta mektep deńgeıinde sheshýge úles qosýynda», dedi spıker.