Memleket basshysy asa kórnekti ǵalym, Qazaqstan Respýblıkasy Ulttyq ǵylym akademııasynyń akademıgi, ekonomıka ǵylymdarynyń doktory, professor, Memlekettik syılyqtyń ıegeri Amanjol Qoshanuly Qoshanovtyń dúnıeden ótýine baılanysty marqumnyń otbasy men jaqyn týystaryna kóńil aıtyp, jedelhat joldady, dep habarlaıdy Egemen.kz Aqordaǵa silteme jasap.
– Amanjol Qoshanuly uzaq jyl tabysty eńbek etip, bar kúsh-jigerin otandyq ǵylymdy damytýǵa arnady. Naryq qatynasyna kóshý kezeńinde irgeli reformalardy júzege asyrýdyń tıimdi joldaryn tereń zerttedi. Bilikti mamandar daıarlaý isine de óz úlesin qosty. Igi qyzmetimen el-jurt aldynda qurmetke bólenip, sońyna óshpes iz, ǵylymı mol mura qaldyrǵan Amanjol Qoshanulynyń esimin halqymyz árdaıym ardaq tutady, – delingen jedelhatta.