Qabyldanǵan sharalardyń nátıjesinde sońǵy 5 jylda, dálirek aıtqanda 2016-2020 jyldar aralyǵynda óndiriste zardap shekkenderdiń sany 10,7%, onyń ishinde qaıtys bolǵandar sany 16,2% tómendegen, dep habarlaıdy Egemen.kz.
Búgin Ortalyq kommýnıkasııalar qyzmetinde ótken brıfıngte EHÁQ mınıstrliginiń Eńbek, áleýmettik qorǵaý jáne kóshi-qon komıteti tóraǵasynyń orynbasary – QR Bas memlekettik eńbek ınspektory Tólegen Ospanqulov osyndaı málimetterdi jarııa etti.
«Statıstıka jónindegi ýákiletti organnyń derekteri boıynsha, 2020 jyly zerttelgen kásiporyndarda 1,6 mln jumyskerdiń 367 myńy nemese árbir tórtinshisi zııandy jáne qaýipti eńbek jaǵdaılarynda jumys istegen. 2019 jyly bul kórsetkish 370 adamdy quraǵan. О́ńirler boıynsha zııandy jáne qolaısyz eńbek jaǵdaılarynda jumys isteıtin qyzmetkerlerdiń kóp sany Qaraǵandy, Pavlodar, Shyǵys Qazaqstan jáne Mańǵystaý oblystarynda baıqalady. Joǵary shý men dirildiń joǵary deńgeıi jaǵdaıynda árbir ekinshi, jumys aımaǵynyń joǵary gazdanýy men shańdanýy áseri jaǵdaıynda árbir úshinshi maman jumys istedi. Aýyr dene eńbegimen 94 myń adam aınalysqan», dedi T.Ospanqulov.
Jumyskerlerdiń qolaısyz eńbek jaǵdaılary ekonomıkalyq shyǵyndarǵa alyp keledi.
Bas memlekettik eńbek ınspektordyń aıtýynsha, ótken jyly 672 myń qazaqstandyq zııandy eńbek jaǵdaılarynda jumys istegeni úshin 141 mlrd teńge kóleminde túrli ótemaqylar aldy, bul 2019 jylmen salystyrǵanda 10%-ǵa artyq.