«Nur-Sultan qalasynyń qorshaǵan ortany qorǵaý jáne tabıǵatty paıdalaný basqarmasy» MM «Jasnur» kásipornymen birlesip, Astana jáne Qoıandy sý qoımalarynyń aýmaǵynda kún saıyn qoryqshylyq qyzmet júrgizedi. Osylaısha, balyq aýlaý, sý qoımalarynyń lastaný jaǵdaıyn baqylaý jáne brakonerliktiń jolyn kesý qamtamasyz etiledi, dep habarlaıdy Egemen.kz elorda ákimdiginiń resmı saıtyna silteme jasap.
Bul jumystar tabıǵı aýmaqtardyń bekitilgen ýchaskelerinde bıologııalyq resýrstardy tıimdi paıdalaný maqsatynda júrgiziledi.
Balyq aýlaý erejeleriniń saqtalýyn, senip tapsyrylǵan aýmaqtyń jaı-kúıin baqylaýdy júzege asyratyn qoryqshylyq qyzmetke belgili bir baǵyt bekitilgen.
Qoryqshylyq qyzmet bir mezgilde kúzetiletin aýmaqtaǵy ósimdikter men janýarlar dúnıesiniń jaı-kúıine baqylaý júrgizedi. Balyq aýlaý áýesqoılary arasynda tıisti erejelerdi saqtaý, sondaı-aq sý qoımalarynyń sanıtarlyq tazalyǵyn saqtaý boıynsha profılaktıkalyq túsindirý únemi júrgiziledi. Sý qoımalaryn brakonerlikten qorǵaý, jaǵasyn qoqystan tazartý, sol sııaqty Qoıandy jáne Astana sý qoımalary aýmaǵynyń lastanýyna jol bermeý boıynsha aldyn alý jumystary belsendi júrgizilýde.
Bıyl «Taza tabıǵat» ulttyq jobasynyń aıasynda ótkiziletin «Taza sý aıdyndary» ekologııalyq aksııasynyń is-sharalaryn iske asyrý sheńberinde «QR Ekologııa, geologııa jáne tabıǵı resýrstar mınıstrligi Balyq sharýashylyǵy komıtetiniń Esil oblysaralyq basseındik balyq sharýashylyǵy ınspeksııasy» RMM-men birlesip Astana jáne Qoıandy sý qoımalarynda balyq aýlaý qaǵıdalarynda ruqsat etilmegen aýlaý quraly retinde tastalǵan 2 aý (sıntetıkalyq monojipterden jasalǵan) tabyldy. Sonymen qatar, ár sý qoımasynyń aýmaǵynda 100 qap qoqys jınaldy.
Aıta ketý kerek, 15 sáýir men 15 mamyr aralyǵynda shortan, aqqaıran jáne kókserke sııaqty balyq túrlerin aýlaýǵa tyıym salyndy. 20 mamyrdan 20 maýsymǵa deıin tuqy balyq túrlerin aýlaýǵa tyıym salynady.
Ýyldyryq shashý kezeńinde ınspektorlarmen birlesip, quqyq qorǵaý, tabıǵat qorǵaý organdarynyń ókilderin jumyldyra otyryp, reıdter júrgizedi. Shekteýler men tyıymdardy buzǵany úshin qoldanystaǵy zańnamada 10-nan 20 AEK-ke deıin ákimshilik jáne qylmystyq jaýapkershilik sharalary qarastyrylǵan. Bul 29-58 myń teńge aralyǵyn quraıdy.