Air Astana Mınskige reıster nege toqtaǵanyn túsindirdi, dep habarlaıdy Egemen.kz.
«Air Astana 31 mamyrda ashylýy josparlanǵan Almaty - Mınsk baǵyty boıynsha áýe qatynasyn toqtatty. Reısterdi toqtatý týraly sheshim 20 mamyrda qabyldandy, bul kommersııalyq júktemeniń tómendigine baılanysty. Jolaýshylarǵa reısterdiń toqtatylǵany týraly habarlama sol kúni jiberildi», dedi avıakompanııanyń baspasóz qyzmeti ókilderi.
Mınskige ushatyn qazaqstandyq áýe reısteriniń toqtap qalǵany keshe, 24 mamyrda belgili bolǵan.
Eske salaıyq, 23 mamyrda kúndiz Ryanair áýe kompanııasynyń Afınadan Vılnıýske ushyp bara jatqan ushaǵy Mınskide shuǵyl qonǵan.
«Ushaq bomba qoıyldy degen habardan keıin qondyryldy», delingen áýejaı habarlamasynda. Keıin bomba qoıyldy degen aqparat rastalmady.
Ushaq bortynda jýrnalıst, Nexta telegram-arnasynyń burynǵy bas redaktory Roman Protasevıch bolǵan. Artynsha batys elderi de bolǵan jaıtqa pikir bildirip, Protasevıchti dereý bosatýdy talap etti.