Áke-sheshesi álginde qonaqqa ketken. Úıde jalǵyz edi. Jaryqtyń jalp etip sóngenine de jarty saǵattan asyp barady. Zerige bastady. Uıqy da keler emes. Aqyry uıaly telefonnyń jaryǵymen túrtinektep júrip túrli-tústi qaryndashtaryn taýyp aldy. Aq qaǵaz da qol sozym jerden tabyldy. Ol sýret salý úshin ústelge kelip jaıǵasty. Bul onyń alǵashqy týyndysy bolatyn, dep habarlaıdy Egemen.kz.
Ekibastuzdyq jas talapker Mádına Túsipova sýret áleminiń esigin oıda-joqta osylaı ashty. 9-synyptan keıin kolledjge túsip, mýzykalyq darynyn odan ári shyńdaımyn dep júrgen shaqta boıda jasyrylǵan jańa qabileti býyrqanyp syrtqa shyqty.
Maı shamnyń jaryǵymen qarakóleńkede salǵan sýreti áıgili «Madagaskar» mýltfılmindegi tórt keıipker bolatyn. Táp-táýir shyqqan sekildi. Sýretti kórgen saıyn «mynany men saldym ba?» dep tańdanyp qoıady. Áke-sheshesine kórsetip edi, olar da ań-tań. Mádınanyń mundaı qabileti baryn buryn baıqamapty. Tuńǵysh balanyń aldaǵy taǵdyry da sol túni sheshildi.
– Mýzykanyń oqýyn qoıa tur, – dedi ákesi.
– Senen jaqsy dızaıner shyǵady! – dep kótermelep qoıdy sheshesi.
Aqyry Ekibastuzdyń gýmanıtarlyq-tehnıkalyq kolledjin tańdady. Buıyrtsa «Dızaın jáne sýret» mamandyǵyn meńgerip shyqpaq. Alaıda oqý ońaıǵa soqpady. Birinshiden, oqý oryssha eken. Qaladaǵy qyzdar gımnazııasynda tálim alǵan Mádına, orysshaǵa júırik bolsa da, saladaǵy termınderdi túsinip, qabyldaýǵa kelgende qatty qınalatyn. Ekinshiden, jańadan túsken stýdentterdiń barlyǵy derlik oqýshy kezinen qaladaǵy kórkemsýret mektepterine baryp, tálim alǵandar. Eń nashary Mádına bolyp shyqty. Bul sýret salýdyń qarapaıym tehnıkalarynyń ózin bilmeıdi eken. Namysqa tyrysyp, ter tógýge týra keldi.
– Á degende belsendilik tanytyp, toptyń «starostasy» atanǵan edim. Sonym durys bolǵan eken. О́ıtkeni biz oqıtyn bólmeniń kilti únemi mende júredi. Sabaqtan keıin qalyp, sheberligińdi shyńdaıtyn oryn bar. Shyq, kiltti tapsyr dep eshkim tyqaqtamaıdy. Sóıtip túske deıin sabaqqa qatysyp, tústen keıin birge oqıtyn stýdentterden baıqap qalǵan artyqshylyqtardy úırenýge tyrystym. Kesh túse qaıtatyn kúnderim kóp edi. Dál osy jaǵdaı kolledjdi támamdaǵansha jalǵasty, – deıdi ol.
Kolledjden keıin birden Pavlodar pedagogıkalyq ýnıversıtetine oqýǵa tústi. Bıyl bitirmek. Endi ol kórkemsýret pániniń muǵalimi bolmaq. Aldaǵy josparyn da osy salamen baılanystyryp otyr. Shákirt tárbıelep, jeke ortalyǵyn ashqysy keledi.
Jalpy, Mádınanyń ónerin kópten beri baqylap júrmiz. Kópshilik ony «sýretti teris salatyn qyz» dep te ataıdy. Bul qabiletin otandyq arnalardyń tikeleı efırinde kórermen qaýymǵa talaı márte kórsetti de.
– 2017 jyly «Ekibastuz arýy» baıqaýynda top jardym. Buǵan buryn da eki márte qatysqan edim. Jolym bolmady. Eki rette de mártebeli qazylardy mýzykalyq qabiletimmen tańǵaldyrǵym kelgen. Alaıda budan eshteńe shyqpady. Onyń ústine qatysýshylardyń deni án aıtý, aspapta oınaý, poezııa oqý sekildi óner túrlerin usynady eken. Al munymen qazir eshkimdi tańdandyra almaısyń. Úshinshi márte qatysqanda erekshe bir dúnıe jasaýdy kózdedim. Sóıtip óz betimshe sýretti teris salý tehnıkasyn meńgerdim. Bul óner shetelde jaqsy damyǵan. Bizdiń elge endi-endi kelip jatyr. Sýretti teris salý – shoýdyń bir túri. Ony eki-úsh mınýttyń ishinde salyp úlgerýiń kerek. Sonda ol kópshilikti birden baýrap alady. Bul jerde kóp jattyǵý talap etiledi. Qoldyń eske saqtaý qabiletin jattyqtyrý kerek, – deıdi Mádına.
Ol sýretshi retinde baıqaý, festıvalderge qatysýǵa asa qulyq tanyta bermeıdi. Degenmen az-kem jetistikteri de barshylyq. Máselen, 2018 jyly oblys kóleminde uıymdastyrylǵan «Egemen el» baıqaýynda top jarǵan. 2019 jyly «Jastar jyly» aıasynda ekibastuzdyqtarǵa jeke kórmesin usyndy. Jurtshylyq jyly qabyldady.
Mádınanyń osy kúnge deıin akvarel, gýash, qaryndashpen salǵan sýretteriniń uzyn-sany 200-den asady. Al maıly boıaýmen salǵan sýretteri budan áldeqaıda az. Aıtýynsha, maıly boıaýmen bir sýretti salýǵa kem degende jarty jyl ýaqyt ketedi eken. Mádına barabanda, dombyrada, gıtara men pıanınoda erkin oınaıdy. Án shyrqaıdy. «Ekibastuz arýy» degen ataǵy jáne bar. Oblystyq «Pavlodar arýy» baıqaýynda da top jaryp, respýblıkalyq dodaǵa joldama alǵan. Qazir Ekibastuz qalalyq radıosynda jańalyqtar júrgizedi. Buıyrtsa, jańa oqý jylynan bastap mektep oqýshylaryna kórkemsýrettiń qyr-syryn úıretýdi josparlap otyr.
– Ázirshe meniń meńgergenim – akademııalyq baǵyt. Iаǵnı sýretti qoldanystaǵy erejelerine, tehnıkalaryna baǵyna otyryp salamyn. Aldaǵy ýaqytta sýret álemindegi óz baǵytymdy tapqym keledi. О́zime ǵana tán ereksheliktiń bolǵanyn qalaımyn, – deıdi jas sýretshi.