Tennısten «Úlken dýlyǵa» sanatyna enetin bıylǵy Fransııa ashyq chempıonaty qazaqstandyq sportshylar úshin óte tabysty aıaqtaldy. Jekeleı synda sportshylarymyz jartylaı fınalǵa deıin jetse, erler arasyndaǵy juptyq synda óner kórsetken Aleksandr Býblık pen Andreı Golýbev tuńǵysh ret Rolan Garros týrnıriniń fınalynda baq synady. Qazaqstan tennısi tarıhynda mundaı iri dodanyń fınalynda oınaý baqyty buryn-sońdy eshbir tennısshige buıyrmaǵan bolatyn.
Tarıhı tabysqa qol jetkizgen jerlesterimiz Rolan Garros jarysynyń bastapqy básekesinde fransııalyq jup Faben Rebýl men Sadıo Dýmbııany eki sette 7:6, 6:1 esebimen jeńip, týrnırdi sátti bastady. Ekinshi aınalymda olar dál osyndaı eseppen horvatııalyq Ivan Dodıg pen slovakııalyq Fılıp Polashekten basym tústi. Al úshinshi aınalymnan bastap qazaqstandyq jup azýly qarsylastarmen baq synasa bastady. Máselen, pleı-off kezeńinde Fransııa ashyq chempıonatynyń 11-raketkalary, nıderlandtyq Ýes Kolhof pen Jan-Jıýlen Roıermen kezdesip, tartysty ótken oıynda Býblık pen Golýbev 7:6, 3:6, 6:4 nátıjesimen jeńiske jetti.
Jerlesterimiz Rolan Garrostyń shırek fınalynda taǵy bir tájirıbeli tennısshiler monakolyq Hıýgo Nıs pen germanııalyq Tım Pıýspen kezdesti. 1 saǵat 16 mınýtqa jalǵasqan oıynda A.Býblık pen A.Golýbev qarsylastarynan esh qıyndyqsyz basym tústi. Birinshi setti qazaqstandyq sportshylar 6:4 esebimen óz paıdalaryna sheshse, ekinshi sette de 6:4 nátıjesimen basymdyq tanytty. Sóıtip týrnırdiń jartylaı fınalynda oınaýǵa múmkindik aldy.
33 jastaǵy A.Golýbev pen odan on jas kishi A.Býblık buǵan deıin «Úlken dýlyǵa» týrnırlerinde juptyq synda bir márte óner kórsetken bolatyn. Mine, bıyl ekinshi ret jartylaı fınalda baq synady. Jeti jyl burynǵy básekede A.Golýbev aýstralııalyq Sem Grotpen birge Rolan Garros týrnıriniń jartylaı fınalyna deıin jetip, bolashaq jeńimpazdar Jıýlen Benneto men Edýard Roje-Vasslenge 6:3, 3:6, 4:6 esebimen ese jibergen-di.
Sondaı-aq A.Býblık taǵy bir qazaqstandyq tennısshi Mıhaıl Kýkýshkınmen birge 2020 jylǵy Aýstralııa ashyq chempıonatynyń jartylaı fınalynda bolashaq chempıondar, amerıkalyq Radjıv Ram men ulybrıtanııalyq Djo Solsberıden 6:4, 3:6, 4:6 esebimen utylyp qalǵan bolatyn. Bul joly jerlesterimiz jartylaı fınalda ıspanııalyq jup Pablo Andýhar men Pedro Martınespen kúsh synasty. Matchty qarqyndy bastaǵan ıspanııalyq jup birinshi partııada 6:1 esebimen basym túskenimen, keıingi eki sette jerlesterimiz qarsylastaryn bet qaratqan joq – 6:4, 6:4. Qazaqstandyq jup – fınalda!
Fınaldyq saıysta otandastarymyz 99,9 paıyz jergilikti jankúıerlerdiń qoldaýymen óner kórsetken kort ıeleri Per-Iýg Erber – Nıkolıa Maıýmen sheberlik baıqasty. Match aldynda tennıs mamandary fransııalyq juptyń esh qıyndyqsyz jeńiske jetetinin boljaǵan. Sebebi Erber men Maıý «Úlken dýlyǵa» sanatyna enetin tórt iri jarystyń (AQSh ashyq chempıonaty, Aýstralııa ashyq chempıonaty, Fransııa ashyq chempıonaty jáne Ýımbldon týrnıri) bárinde juptyq synda top jarǵan tájirıbeli tennısshiler sanalady.
Fınaldyq saıystyń birinshi partııasynda óte senimdi oınaǵan qazaqstandyq jup alǵashqy partııany óz paıdalaryna sheshti – 6:4. Ekinshi sette de Býblık pen Golýbev jeńiske jetýge bir taban jaqyn turǵan-dy. Alaıda jıi qatelikke boı aldyrǵan jerlesterimiz bul partııany qarsylastaryna berip qoıdy – 6:7. Sheshýshi sette eki jup ta óte saq oınap, óz múmkindikterin tıimdi paıdalanyp otyrdy. Tek jetinshi geımge kelgen kezde Maıý men Erber jalǵyz breık-poıntty tıimdi paıdalanyp, týrnırdiń bas júldesin jerlesterimizden tartyp aldy. Qorytyndy esep – 6:4, 6:7, 6:4. Osylaısha, jerlesterimiz Rolan Garros jarysynyń juptyq synynda vıse-chempıon atandy.
Áıelder arasyndaǵy jekeleı synda álemdik reıtıngte 33-orynda turǵan Chehııa sportshysy Barbora Kreıchıkovanyń mereıi ústem boldy. Ol fınalda reseılik sportshy Anastasııa Pavlıýchenkovany úsh sette 6:1, 2:6, 6:4 nátıjesimen qapy qaldyrdy. Aıta keteıik, Pavlıýchenkova jartylaı fınalda otandasymyz Elena Rybakınadan aılasyn asyryp, fınalǵa joldama alǵan bolatyn.