Qart qurlyqtyń aıaqdopshylary alas-kúles aıqasty bastap ketti. Toptyq oıyndar tizgin aǵytqaly bir aptanyń júzi boldy. Atam qazaq «bireý toıǵa aınalsa, bireý qoıǵa...» degendeı bolashaǵy zor aıaqdopshylardy aıaq alysynan aınytpaı tanıtyn fýtboldyń kúreńbaılary skaýt-barlaýshylar Eýropa chempıonaty sııaqty iri jarystardan bolashaq myqtylardy izdeıtini anyq. Sheteldik basylymdar skaýt-barlaýshylar nazaryna ázirge tórt fýtbolshy ilikkeni týraly jazyp jatyr. Olar...
Brýno Petkovıch. Bul jigit qazir 27 jasta. 2019 jyldan bastap Horvatııa ulttyq quramasy sapynda óner kórsetip júr. Pozısııasy – shabýylshy. Nátıjesi jaman emes. Qurama sapynda 8 oıyn ótkizip, 5 goldyń avtory atanǵan. 2018 jyly álem chempıonatynda horvatııalyqtar qarsylastarymen jan bere aıqasyp, ekinshi orynǵa ıelik etkeni belgili. Biraq odan beri úsh jyl ótti. Qurama qatary birshama ózgerdi. Sonyń biri ataqty shabýylshy Marıo Manjýkıch «zeınetke» shyqqandyqtan, onyń ornyna birden-bir laıyq aıaqdopshy retinde Brýno Petkovıchtiń qabyldanýy. Eger osy chempıonatta bul jigit ilkimdilik tanytsa, sóz joq Eýropanyń bedeldi klýbtary qataryna alary anyq.
Aleksandr Sobolev. Máskeýdiń «Spartak» klýbynyń jáne Reseı ulttyq quramasynyń shabýylshysy. 1997 jyly Barnaýl qalasynda dúnıege kelgen. Byltyr Reseı Premer-lıgasynda 15 doptyń avtory atanǵan. Ulttyq qurama sapynda 6 oıyn ótkizip, 3 gol soqqan. Bul jaman nátıje emes. Ásirese bul fýtbolshy boıshańdyǵynyń (195 sm) arqasynda baspen oınaýǵa jap-jaqsy tóselgen. Sheteldik basylymdar «Sobolevtiń 9-shy nómirli jeıdege ıe bolýy – quramanyń negizgi shabýylshysy Artem Dzıýbany almastyratynyna aıǵaq», dep jazyp jatyr. Kózi qyraǵy skaýt-barlaýshylar buıyrsa bul bala EÝRO-2020 chempıonatynan keıin otandastary Andreı Arshavın, Iýrıı Jırkov, Aleksandr Golovın sııaqty qart qurlyqtyń bedeldi klýbtarynda óner kórsetedi deıdi.
Ionas Vınd. 1999 jyly Danııada dúnıege kelgen. 2015 jyly 16 jasynda ulttyq qurama sapyna qabyldanǵan talantty jas. Oıyn pozısııasy – shabýylshy. Qazirgi tańda Danııanyń kásibı fýtbol klýby «Kopengagende» óner kórsetip, 30 goldyń avtory atanyp úlgergen. Byltyr bul jigitti aǵylshynnyń «Vest Hem» klýby qataryna qosý úshin kóp árekettendi. Biraq eki jaq qarjyǵa kelise almaǵandaı boldy. Danııa quramasy sapynda ataqty shabýylshylar Martın Breıtýeıt («Barselona») jáne Iýssýf Polsonmen («RB Leıpsıg») tize qosyp, Ionas Vınd da óner kórsetýde.
Ýgardjan Chakyr. Bul azamat 1996 jyly týǵan. Fýtboldan Túrkııa quramasynyń qaqpashysy. Statıstıkaǵa júginsek, atalǵan quramanyń ereksheligi – EÝRO-2020 chempıonatynda qataryna eń jas oıynshylar jınaǵan jalǵyz komanda eken. Desek te bul quramada bolashaǵynan úmit kúttirer aıaqdopshylar kóp. Sonyń biri biz atap ótken qaqpashy Chakyr. Bul jigit chempıonatqa irikteý kezinde aıryqsha kózge túsipti. Qanshama oıynda qaqpasyna úsh-aq gol ótkizgen. Sonyń arqasynda túrkııalyqtar Eýropa tórinde óner kórsetip júr. Ýgardjanǵa qazirdiń ózinde aǵylshyn Premer-lıgasynyń úzdikteri «Lıverpýl», «Tottenhem, «Lester Sıtı» qatarly klýbtar kóz tigip otyrǵan kórinedi.