NS street life kóshe sportyna arnalǵan keshen (kolızeı) elordadaǵy Muńaıtpasov kóshesindegi Stýdenttik saıabaqqa ornatylady, dep habarlaıdy elorda ákimdiginiń resmı saıty.
Kóshe sportyna arnalǵan eki deńgeıli mýltıfýnksıonaldy arena buqaralyq sportty damyta túspek.
Onda basketbol, fýtbol, boks týrnırleri men bı jarystaryn ótkizý josparlanýda. Al qysta trıbýna muz aıdynyna aınalýy múmkin. Ony ornatý jumystary bastalyp ketti. Sport áýesqoılaryna arnalǵan jańa oryn shilde aıynda ashylmaq.
«Nur-Sultan – jaıly qala» master-josparynyń tujyrymdamasy aıasynda qoǵamdyq keńistikter, saıabaqtar, jaıly qalalyq orta, onyń ishinde kóshe sportyn nasıhattaý úshin ınfraqurylym salý qolǵa alyndy. Mundaı alańdardyń árbir aýdanda bolýy úshin polısentrlik qaǵıdat eskeriledi», dep atap ótti Nur-Sultan qalasynyń sáýlet, qala qurylysy jáne jer qatynastary basqarmasynyń basshysy Nurlan Uranhaev.
NS street life kóshe sport arenasynda tórt kireberis, onyń ishinde aınala otyratyn oryn bolady. Ekinshi deńgeıde kóleńkeli shatyrlar qarastyrylǵan. Birinshi deńgeıde otyratyn oryndar sany – 350 adam, ekinshi deńgeıde – 100-ge jýyq.
«Bos aýmaqtar – sport úshin eń qolaıly oryn. Al Atatúrik atyndaǵy saıabaqta ıoga alańy uıymdastyrylady. Kóshe sporty kolızeıiniń ishi men syrtynda birneshe jarysty qatar ótkizýge bolady», dep atap ótti Ýrbanıstıka ortalyǵynyń basshysy Elnar Bazyken.
Elordada «Nur-Sultan – jaıly qala» master-jospary aıasynda bıyl 160 aýla men qoǵamdyq keńistikti abattandyrý josparlanyp otyr.