Qaraǵandyda kópqabatty úıdiń ekinshi qabatynda ornalasqan páterdiń terezesinen 4 jastaǵy bala qulap ketti. Ol túrli jaraqatpen aýrýhanaǵa jetkizildi, dep habarlaıdy Egemen.kz.
«24 maýsym kúni keshke Qaraǵandy qalasynyń 14-shaǵynaýdanynda 2-qabatta ornalasqan páterdiń terezesinen 2017 jyly týǵan qyz bala qulap tústi. Balanyń ata-anasy sol sátte kórshi bólmede bolǵan. Bala túrli jaraqattarmen medısınalyq mekemege jatqyzyldy», dep habarlady Qaraǵandy oblysynyń TJD.
Dárigerler balanyń jaǵdaıy ortasha aýyrlyq dárejede dep málimdedi.
«Balanyń bas mıy shaıqalyp, jambas býyny shyǵyp, balalar jaraqat bólimine jatqyzyldy. Jaǵdaıy ortasha aýyrlyqta dep baǵalanady», dep túsindirdi Qaraǵandy oblysy Densaýlyq saqtaý basqarmasynyń baspasóz qyzmeti.
Qaraǵandy oblysynyń Tótenshe jaǵdaılar departamenti jas balalardyń terezeden qulaý faktileriniń jıilep ketýine baılanysty alańdaýshylyq bildirýde.
TJD qyzmetkerleri polısııamen birlesip barlyq jerde balalar qaýipsizdigi sharalaryn túsindirý boıynsha úgit-nasıhat jumystaryn júrgizýde. Biraq, ádette, jazda balalardyń qulap ketý faktileri artady. Eresekter keıde balany birneshe sekýndqa qaraýsyz qaldyrýdyń orny tolmas saldarǵa ákelýi múmkin ekenin este ustaýy kerek.
Eger siz sergek bolmasańyz, balalardyń qyzyǵýshylyǵy ólimge ákelýi múmkin. Qaraǵandy oblysynyń TJD mamandary qaýipsizdik sharalary týraly taǵy da eske salady:
- Kishkentaı balalardy terezeleri ashyq úı-jaılarda jalǵyz qaldyrmańyzdar, sebebi qulaý jaǵdaılarynyń kópshiligi ata-analar balalaryn qaraýsyz qaldyrǵan kezde oryn alady.
- Terezelerden barlyq jıhazdardy alshaqtatyp ysyryp tastańyzdar, bala olarǵa minip, terezeniń aldyna shyǵyp ketýi múmkin.
- Eshqashan moskıt torlaryna senbeńizder! Olar qulaýdan qorǵaýǵa arnalmaǵan! Kerisinshe, moskıt tory qaıǵyly jaǵdaıǵa yqpal etedi, óıtkeni bala ózin qaýipsiz sezinedi jáne oǵan súıenedi. Kóbinese balalar torlarmen birge qulap ketedi.
- Balaǵa terezeni birneshe santımetrden artyq ashýǵa múmkindik bermeıtin arnaıy bekitkishterdi qoıyńyz.
- Eger sizde dál qazir qulyptaý nemese saqtandyrý qurylǵysyn ornatý múmkindik bolmasa, tereze tutqasyn ońaı burap alyp tastap, ony tek qajet bolǵan jaǵdaıda ǵana paıdalanýǵa bolady.