Qasym-Jomart Toqaev Aqmola oblysyndaǵy qazirgi Covid-19 indetine qatysty ahýalmen jáne óńirdegi densaýlyq saqtaý qyzmetiniń jaǵdaıymen tanysty, dep habarlaıdy Egemen.kz Aqordaǵa silteme jasap.
Prezıdentke aımaqta koronavırýs indetine shaldyqqan naýqastardyń 22 juqpaly aýrýlar stasıonarynda emdelip jatqany, tósek-oryn qory 2113 orynǵa jetkizilip, taǵy 5 myńy rezervte turǵany týraly baıandaldy. Memleket basshysynyń tapsyrmasy boıynsha dári-dármek qorymen de qamtamasyz etilgen.
Budan keıin Qasym-Jomart Toqaev qaterli isik aýrýynyń belgileri bar jáne osy dert boıynsha esepte turǵan naýqas adamdarǵa konsýltatıvti-dıagnostıkalyq kómek kórsetýge mamandandyrylǵan onkologııalyq emhanany aralap kórdi.
Memleket basshysy oblysta medısına ınfraqurylymy jaqsy qarqynmen damyp, jańa nysandar boı kóterip jatqanyn atap ótti. Onyń aıtýynsha, josparly túrde em alatyn azamattarǵa, júrek-qan tamyrlary dertimen jáne qaterli isikpen aýyratyn naýqastarǵa kórsetiletin medısınalyq qyzmet túrleri kovıd kezeńine deıingi deńgeıde bolýy tıis.
Prezıdent densaýlyq saqtaý salasynyń mamandaryna qajyrly eńbegi úshin rızashylyǵyn bildirdi.
– Medısına qyzmetkerleriniń jumysyna, ásirese pandemııa kezeńinde salmaq túsip otyr. Eńbek demalysyna da barmaı, senbi-jeksenbi kúnderi de damyl kórmeı jumys istep júrgeni úshin medısına qyzmetkerlerine alǵysymdy bildiremin. Dárigerlerge óte qıyn, biraq biz olardy qoldaımyz, – dedi Qasym-Jomart Toqaev.