Qarapaıym halyqty áleýmettik turǵydan qoldaý maqsatynda qazirgi kezde memleket tarapynan taǵaıyndalǵan járdemaqynyń túri kóp. Ony túrli sanattaǵy azamattar alyp ta keledi. Máselen, byltyr elimizde karantın bolǵan kezde, tabysynan aıyrylǵandarǵa 42 500 teńgeden berilgen edi. Sol sııaqty kópbalaly jáne az qamtylǵan otbasylarǵa da memleket tıisinshe kómek kórsetilýde. Alaıda Jambyl oblysynda kópbalaly ákelerdiń zańsyz járdemaqy alyp kelgeni anyqtalyp otyr. О́ńirde kópbalaly otbasylarǵa beriletin memlekettik járdemaqyny taǵaıyndaý boıynsha monıtorıng júrgizilip, nátıjesinde, memleketke 14 mln teńgeden asa zalal kelgeni belgili boldy.
Elimizde múmkindigi shekteýli jandarǵa tólenetin járdemaqynyń ortasha mólsheri 48 myń teńgeni quraıdy. Bul rette Sybaılas jemqorlyqqa qarsy is-qımyl agenttiginiń Jambyl oblysy boıynsha departamenti basshysynyń birinshi orynbasary Ravıl Tólebaev kópbalaly otbasyna járdemaqy taǵaıyndaý kezinde otbasy quramynda tiri týǵan, asyrap alynǵan, sondaı-aq qamqorlyqqa alynǵan balalar basqa ata-anasynyń otbasynda eskerilmegen bolsa, jıyntyq balalar eskeriletinin jetkizdi. О́z kezeginde atalǵan qaǵıdanyń 9-tarmaǵyna sáıkes, ótinish berýshi birge turatyn balalardyń kópbalaly otbasyna járdemaqy taǵaıyndaý týraly ótinishin kórsete otyryp, balalardyń birlesken turǵylyqty mekenjaıyn rastaıdy. Sonymen qatar Azamattyq kodeksiniń 16-babyna sáıkes, on tórt jasqa tolmaǵan balalardyń zańdy ókilderiniń turatyn jeri olardyń turǵylyqty jeri bolyp tanylady eken.
Sondaı-aq R.Tólebaev erli-zaıyptylar arasynda neke buzylǵan jaǵdaıda ata-anasynyń bireýimen balalardyń birge turýy sot sheshimimen rastalatynyn aıtty. «Alaıda birneshe járdemaqy alatyn azamat ótinishinde balalary ózimen birge turady dep kórsetkenimen, sot sheshimimen olardyń anasymen birge turatyny belgili bolǵan», deıdi ol.
Bul rette «Azamattarǵa arnalǵan úkimetten» kópbalaly otbasylarǵa beriletin járdemaqynyń ata-analar arasynan tek ákesi tarapynan ótinish bildirgender týraly aqparat suratylyp, ol tizim boıynsha qalalyq sot sheshimimen sáıkestendirilip, qaraldy.
«Bas tartylǵan qalǵan ister boıynsha járdemaqy alýshylar artyq tólengen somany erikti túrde qaıtarýǵa mindettelip otyr. Zertteý barysynda 27 tólem alýshy boıynsha 14 mln 337 myń 143 teńge kóleminde artyq tólemdi qurady. Artyq tólengen somadan 150 myń teńge respýblıkalyq bıýdjetke qaıtaryldy. Kópbalaly otbasylar, ádette, az qamtylǵandyqtan, aqshalaı qarajatty qaıtarýdy olar birtindep júrgizedi. Sondaı-aq taǵy 38 tólem alýshy boıynsha tıisti jumys júrgizilýde. Al 18 tólem alýshy aı saıyn járdemaqyny alý úshin, bergen ótinimderinde durys emes aqparat engizý arqyly birge turatyn balalar sanyn kóbeıtken. Atalǵan azamattardyń is-áreketinde alaıaqtyq belgileriniń baıqalýyna baılanysty, sheshim qabyldaý úshin polısııa departamentine joldandy», deıdi atalǵan departamenttiń basqarma basshysy Dáýren Omarov.
Rasynda, búginde qoǵamda balalaryn alǵa salyp, sol arqyly kóldeneń paıda tapqysy keletinder qatary kóbeıýde. Biraq zańdy belden basyp, ońaı oljaǵa kenelýdiń aqyry osyndaı bolyp otyr. Mamandardyń aıtýynsha, járdemaqynyń zańsyz taǵaıyndalýyna ákelip soqqan basty faktordyń biri – kórsetiletin qyzmet standartynda «Azamattarǵa arnalǵan úkimet» qyzmetkerleriniń qujat qabyldaý kezinde sot sheshimin talap etý quqyǵynyń bolmaýy eken. Al elimizdiń Eńbek jáne halyqty áleýmettik qorǵaý mınıstrliginiń Eńbek, áleýmettik qorǵaý jáne kóshi-qon komıteti Jambyl oblysy boıynsha departamentiniń málimetine súıensek, qazirgi tańda 124 adamnyń ishinen 59 otbasy járdemaqyny zańǵa sáıkes alyp otyr.
«27 is ótinish berýshiniń birge turatyny týraly jalǵan málimet usynýyna baılanysty bas tartyldy. Onyń ishinde 2 tólem alýshy boıynsha ákesimen birge turmaıtyn balalardy esepke almaı, járdemaqy mólsherin azaıtý jaǵyna qaraı qaıta esepteý týraly sheshim qabyldandy», deıdi Eńbek, áleýmettik qorǵaý jáne kóshi-qon komıtetiniń Jambyl oblysy boıynsha departamenti basshysynyń mindetin atqarýshy Raıhan Nazarova.
Jambyl oblysy