QR Sıfrlyq damý, ınnovasııalar jáne aeroǵarysh ónerkásibi mınıstrligi ınnovasııalyq granttar boıynsha ekinshi konkýrsqa ótinimder qabyldaýdy bastady, dep habarlaıdy Egemen.kz. Bul jóninde mınıstr Baǵdat Mýsın málimdedi.
«Bıyl biz 1-12 aqpan aralyǵynda ınnovasııalyq granttar berý boıynsha pılottyq baıqaý ótkizgen bolatynbyz. Barlyǵy 661 ótinim túsip, jiti suryptaý men qazylardyń tańdaýynan keıin sońǵy kezeńge tek bes úmitker ǵana ótti: «ForumVR», InTech-Forecast «JQK nysandary úshin IT-baǵdarlama jasaý», «COWMAS – IQM týraly málimetterdi baqylaý jáne saraptaý», «Smart Termınal» jobasy, «Faceplate». Olarǵa tehnologııalardy kommersııalandyrýǵa arnalǵan ınnovasııalyq granttar berý týraly sharttar jasaldy», dep jazdy mınıstr.
Pılottyq konkýrstyń nátıjesi boıynsha sarapshylar men grantqa ıe bolǵan adamdardyń oı-pikirlerin eskere otyryp, baıqaý sharttaryna birqatar ózgerister engizildi. Endi baıqaýǵa qatysam deýshilerde akselerasııalyq baǵdarlamalardan sátti ótkendigin dáleldeıtin sertıfıkat bolýy tıis. Onyń ústine ekinshi jáne úshinshi kezeńdegi irikteýge qatysý úshin aldymen birinshi satydan ótý shart.
Qarjylandyrý sharttary da birshama ózgerdi. Birinshi satyny iske asyrýǵa arnalǵan ınnovasııalyq grant somasy 20 mıllıon teńgeden, al ekinshi jáne úshinshi satylar úshin 80 mıllıon teńgeden aspaıtyn boldy.
«Keshe ınnovasııalyq granttar berý boıynsha ekinshi konkýrs jarııalandy. О́tinimder 2021 jylǵy 10-23 tamyz aralyǵynda https://qazinn.kz/ portaly arqyly qabyldanady. Barlyq suraqtar boıynsha tikeleı Ilıas Ospanovqa nemese Community QazInnovations keńes berý Telegram-arnasyna jaza alasyzdar. Barlyq jasampaz jandardy osy konkýrsqa qatysýǵa shaqyramyn, bul – startaptaryńyzdy júzege asyryp, damytý úshin óte jaqsy múmkindik. Iske sát!», delingen jazbada.