Jeńil atlet Krıstına Tımanovskaıa Olımpııa oıyndarynda Belarýs quramasynyń basshylyǵy onyń 4h400 metrlik estafetaǵa qatysatyny týraly sheshim qabyldaǵanyna narazylyq bildirip, áleýmettik jelide synǵa aldy. Sportshynyń aıtýynsha, bul onyń daıyndalǵan beıini emes. Bir kúnnen keıin Belarýs quramasynyń ókilderi Tımanovskaıany Mınskige qaıtaratynyn habarlady.
Sportshy bolsa, Halyqaralyq Olımpıada komıtetinen kómek surady. Tokıo áýejaıyndaǵy keleńsizdikterden keıin belarýstik sprınter Krıstına Tımanovskaıa qazir qaýipsiz jerde degen habar tarady.
«31 shildede maǵan Ulttyq quramanyń bas bapkeri Iýrıı Moısevıch keldi. Ol 200 metrge júgirýden bas tartýymdy usyndy. Onyń aıtýynsha, men jaraqatym bar dep elge oralýym kerek. Qazir meni tek Olımpıadadan alyp tastaǵysy keledi, biraq eger usynystan bas tartsam jáne saıysty jalǵastyrsam, onda olar meni quramadan shyǵaryp tastaıdy, jumystan aıyrady jáne basqa da saldary bolýy múmkin.
Jattyqtyrýshy ekeýmiz uzaq sóılestik, nátıjesinde, men jarysqa qatysamyn degen sheshimge keldik. Biraq eshqandaı túsinikteme bermeımin. Tek júgirgennen keıin ǵana úıge qaıtamyn. Degenmen oıym iske aspady. Keshe meniń bólmeme Belarýs ulttyq quramasynyń ókili Artýr Shýmak pen bas bapker kelip, birneshe saǵattyń ishinde áýejaıda bolýym kerektigin aıtty.
Kıimimdi uzaq jınadym. Sol kezde joldasymmen, týystarymmen habarlastym. Sońynda qazir úndemeı jınalyp, áýejaıǵa jetken soń polısııaǵa shaǵymdanamyn dep uıǵardym. Olar 10 mınýt saıyn kelip tekserip turdy. Áýejaıǵa jetken soń, polısııaǵa bardym», dedi ol.
Buqaralyq aqparat quraldarynyń jazýynsha, sportshy Haneda áýejaıyna jete salysymen, polısııaǵa shaǵymdanǵan. HOK qazir sportshy uıymnyń qaraýynda jáne jaǵdaıy jaqsy ekenin habarlady.