Nur-Sultan qalasynda tórt jasar bala kópqabatty úıdiń terezeden qulap ketti. Bul týraly elordalyq Polısııa departamenti málimdedi, dep habarlaıdy Egemen.kz.
«2 tamyz kúni saǵat 20:37-de polısııaǵa Imanbaev kóshesindegi kópqabatty úıdiń segizinshi qabatyndaǵy terezeden tórt jasar balanyń qulap ketkeni týraly habarlama kelip tústi. Bala ata-anasymen birge páterde bolǵan. Ol oınap júrip terezeniń taqtaıyna shyqqan. Moskıt toryna súıengen ol, ókinishke qaraı, qulap ketti. Balanyń ákesi qutqaryp úlgere almaǵan. Alǵan jaraqat saldarynan bala oqıǵa ornynda kóz jumdy», dedi Polısııa departamentiniń baspasóz qyzmeti.
Quqyq qorǵaý organdarynyń málimetinshe, jyl basynan beri elordada 25 bala terezeden qulap, olardyń úsheýi qaıtys boldy. Polısııa qyzmetkerleri ata-analardan balalaryn qaraýsyz qaldyrmaýdy jáne ashyq tereze janynda oınaýǵa jol bermeýdi suraıdy.