Elordada jol erejesin óreskel buzǵan mas júrgizýshini basqa kóliktegiler túsip kelip toqtatpaq bolǵan. Alaıda olardan qashpaq bolǵan mas júrgizýshi aldyndaǵy kólikti soǵyp toqtady, dep habarlaıdy Egemen.kz.
Oqıǵa keshe saǵat 21.49-da elordanyń Máńgilik el dańǵylynda bolǵan. «Toyota» markaly kólik júrgizýshisi jol erejesin óreskel buzyp, apatty jaǵdaı týǵyzǵan. Júrgizýshini toqtatpaq bolǵan elorda turǵyndarynyń biri qarsylyqqa tap boldy. Oqıǵa ornyna kelip jetken patrýldik polısııa ekıpajy júrgizýshiniń qujatyn tekserý kezinde kólik salonynan ishimdiktiń ıisin burqyrap turǵanyn baıqaǵan.
Medısınalyq saraptama qorytyndysy er adamnyń jeńil dárejede mas kúıde bolǵanyn anyqtady. Kólikti mas kúıde júrgizgen er adamǵa qatysty QR Ákimshilik quqyqbuzýshylyqtar týraly kodeksiniń 608-baby 1-tarmaǵy boıynsha ákimshilik óndiris qozǵaldy. Kólik aıyp turaǵyna qoıyldy.
Sot sheshimi boıynsha, júrgizýshi on bes táýlikke ákimshilik qamaýǵa alynyp, jeti jyl merzimge kólik júrgizý quqyǵynan aıyryldy.
Polısııada elordada ótken jylmen salystyrǵanda mas júrgizýshilerdiń kóbeıgenin atap ótti. Byltyrǵy 7 aıda qalada 308 mas júrgizýshi ustalsa, bıylǵy jyldyń osyndaı kezeńinde mas kúıinde kólik júrgizgen 861 adam jaýapqa tartylǵan. 2021 jyldyń basynan beri mas júrgizýshiler kesirinen 10 adam túrli dene jaraqatyn alyp, bir adam qaza bolǵan. Jalpy osyndaı 162 jol-kólik oqıǵasy tirkelgen.
«Osyndaı oqıǵalar saldarynan beıkúná adamdar qaza taýyp, jaraqat alatynry ókinishti. Mas júrgizýshiler kinásimen bolatyn apatty jaǵdaıdyń aldyn alý – elorda polısııasynyń basty mindeti.
Jol qozǵalysyn kún saıyn qadaǵalaý, kólikti mas kúıinde júrgizý faktisin boldyrmaý boıynsha reıd kún saıyn júrgizilýde», dep atap ótti elordalyq polısııanyń basshysy Erjan Sádenov.