Zańmen bekitilip, jylyna bir ret beriletin kezekti eńbek demalysy jumys isteıtin ár adam úshin, ásirese shyǵarmashylyq adamy úshin asa mańyzdy. Jaz mezgili jaqyndaǵannan bastap demalysty este qalatyndaı etip ótkizýdi oılastyryp, ishteı túrli jospar túzý súıikti ermektiń birine aınalyp, asyǵa kútedi. Densaýlyqqa kóńil bólip, sharshaǵan aǵzany qalypqa keltirip, boıǵa kúsh-qýat jınap qaıtýǵa árkim qumbyl. Demalysqa kezektespeı-aq búkil qyzmetkeri bir mezgilde ketip, qol ustasyp birge keletin dástúri bar sanaýly ujymnyń biri – teatr. Apta basynda Ǵabıt Músirepov atyndaǵy balalar men jasóspirimder teatrynyń basshylyǵy jazǵy eńbek demalysynan oralǵan ujymdastaryn tosyn jaǵdaıda qarsy aldy.
Áleýmettik jelige, ásirese Instagram jelisine qumar jas býyn ártister kólde demalǵan, kınoǵa túsken, týǵan aýylynda aýnap-qýnaǵan qýanyshty sátterin oqyrmanymen úzdiksiz bólisip otyrǵany belgili. Teatr foıesine jeli paraqshasynda jarııalanǵan demalys sátinen túsirilgen sýretterdiń fotokórmesi jasalyp, jaz qyzyqtaryn jarııa etti. Kimniń qaıda bolǵany, qalaı demalǵany kórer kózge anyq kórinedi. Mańdaıyn kún súıip, jel qaqtaǵan, otyz kúngi demalys oınaqy minez syılap, júzi qýnaq tartqan akterler mundaıdy kútpegeni anyq, ózderiniń teatrdan tys qarapaıym ómirin beınelegen aq-qara tústi sýretterin kórip esi shyǵa qýanyp, máz bolyp jatty. Mysaly, beldi ártisterdiń biri Rahman Omar jary, teatr aktrısasy Aqmaral Daırabaevamen, ulymen birge týǵan jeri Alakólde demalyp qaıtqan. Talantty akter Maqsat Sábıtov Qasym han týraly týyndyny túsirip jatqan Aqan Sataevtyń «Uly dala tańy» fılminiń, al jas aktrısa Dınara Nurbolat «Qara tańba» teleserıalynyń túsiriliminde júrgen. Kórermenniń súıikti aktrısasy Aıda Jantileýova otbasymen Túrkııadan oralǵan beti eken. Kádirbek Demesinov, Gúljamal Qazaqbaeva, Lıdııa Kádenova sekildi aǵa býyn ártister oqshaýlanǵan ómirdiń tártibin buza almaı, nemere baǵyp, úıde otyrǵandaryn aıtty. Budan keıin kórermender zalyna jınalǵan qyzmetkerlerge shaǵyn beınefılm kórsetildi.
Qatal karantın tártibine baǵyna otyryp jumys istegen teatr eki maýsym aralyǵynda kórermenge 135 qoıylym, 4 premera usynǵan. Teatr dırektory Azamat Satybaldy: «Bıyl teatr jańa 75-maýsymynyń shymyldyǵyn ashady. Jańa degen – jaqsy sóz. Bul aldaǵy maýsymǵa jaqsy kóńil kúımen, jańa ıdeıalarmen, sony shyǵarmashylyq josparmen qadam basý degen sóz. Teatr – keleshek úshin jumys isteıtin mekeme, endeshe ol úzdiksiz alǵa qadam basýdy ǵana mejege alýy tıis. Qum keship, qaıyrlap qalǵan keme sekildi teatr bir orynda turyp qalsa, ol sózsiz regreske alyp keledi. Básekesi mol kezeńde teatrǵa kórermendi kóbirek tartý jolyn qarastyrý – basshylyq mindeti. Bıylǵy jyly teatr bıletiniń qunyn kóterýdi kózdep otyrmyz. Shyǵyny kóp, kóp jaǵdaıda ózine arqa súıep jumys isteıtin teatrdyń zamanaýı marketıngi qalyptasyp, ózin ózi asyraýdyń úlgisin qalyptastyrýy kerek. Ol úshin akter oıynynyń sapasy artyp, sol baǵaǵa sáıkes bolýy tıis.
«Teatr maýsymy qazan aıynda ashylýy kerek» degen buljymas qaǵıda esh jerde jazylmaǵan. Sondyqtan jyldaǵy dástúrdi buzyp, qazandy kútpeı-aq qyrkúıek aıynyń alǵashqy aptasynda jańa maýsymnyń shymyldyǵyn ashyp, kórermendi jańa premeramen qýandyramyz. Aldaǵy ýaqytta teatrdy jyl on eki aı jumys isteıtin, jumysy jazda da toqtamaıtyn teatrǵa aınaldyrý josparda bar. О́ıtkeni kórermenmen baılanysty úzýge bolmaıdy. Teatrdan qol úzip, kóz jazyp qalǵan kórermen tez sýyp qalady. Rýhanı dúnıeden nár alyp, elikken, qyzyqqan kórermendi ary qaraı qyzyqtyra túsý – bizdiń mindetimiz. Sol sebepti qyrkúıekte birden eki spektakl premerasynyń tusaýy kesilip, kórermenge tartý etiledi. Qazan aıynan bastap M.Áýezovtiń «Qaragóz», Tólen Ábdiktiń «Biz úsheý edik» jáne balalarǵa arnalǵan taǵy bir spektakl, barlyǵy bes qoıylymdy sahnaǵa shyǵarý josparda tur».
Nur-Sultan, Túrkistan qalalaryna jasalatyn gastroldik saparlardan bólek, Azamat Satybaldy Ǵ.Músirepov teatrynyń A.Chehov festıvaline shaqyrtý alyp otyrǵan qazaqstandyq eń alǵashqy ári jalǵyz teatr ekenin qýanyshpen súıinshiledi. Halyqaralyq Chehov festıvali degen ne? Teatr dırektorynyń tarata túsindirgenine qaraǵanda, Chehov festıvali – TMD aýmaǵyndaǵy ǵana emes, dúnıejúzilik deńgeıdegi eń aýqymdy teatr báıgesi. Halyqaralyq teatr qaýymdastyqtary bir aýyzdan bekitken Chehov festıvali – álemdik teatr baǵyttarynyń, alýan túrli teatr dástúri men túrli teatr mektepteriniń bas qosyp, toqaılasatyn tanymal shyǵarmashylyq alańy bolyp sanalady. Onda jyl saıyn mindetti túrde aıyryqsha teatr jańalyǵy tanylady. Osy ýaqytqa deıin bul festıvalge kúlli Orta Azııa keńistiginen tek qyrǵyz teatry ǵana «Máńgúrt» spektaklimen qatysqan. Al talaı jyldyq tarıhy bar, bedeldi festıvaldiń spektaklderin sarapqa salyp, úzdikterin anyqtaıtyn qurmetti qazylar alqasyna azııalyq bes memleketten tek Ázirbaıjan Mámbetov qana bir márte tóraǵalyqqa shaqyrylǵan. Sondyqtan Ǵ.Músirepov teatrynyń álemdik mańyzǵa ıe festıvalge shaqyrtý alýy teatrdyń ǵana emes, ult mádenıetiniń bórkin aspanǵa atyp qýanatyndaı aıtýly jetistigi retinde qabyldanyp otyr. Qarasha aıynyń sońynda dúnıe júzindegi eń myqty teatrlar júırik spektaklin baptap ákelip qosatyn báıgege Qazaqstannyń atynan rejısser Farhad Moldaǵalıdiń «Qulageri» qosylady. «A» sanattaǵy halyqaralyq óner báıgesinen júldemen oralsa, ári qaraı budan da joǵary eýropalyq baıqaýlarǵa esik ashylyp, jastar teatry joldama alady. «Músirepov teatry osy múmkindikti qoldan shyǵaryp almaýdyń ázirligine búginnen bastap kirisýi kerek», dedi qashan da shyǵarmashylyq qazanynda qaınap júretin A.Satybaldy.
ALMATY