Oıpyrm-aı, Ońtústikte oryn alǵan osynaý bir oqıǵany kórsetpegen, jazbaǵan aqparat quraldary qalmady ǵoı deımin. Eldiń bári jańa jyl merekesin toılap, erteńine endi esterin jınap jatqan kezde belgisiz kelinshek Shymkenttiń shetindegi Qaıtpas eldi mekenindegi bir úıdiń aýlasyna úsh birdeı jas balasyn tastap ketipti.
Oıpyrm-aı, Ońtústikte oryn alǵan osynaý bir oqıǵany kórsetpegen, jazbaǵan aqparat quraldary qalmady ǵoı deımin. Eldiń bári jańa jyl merekesin toılap, erteńine endi esterin jınap jatqan kezde belgisiz kelinshek Shymkenttiń shetindegi Qaıtpas eldi mekenindegi bir úıdiń aýlasyna úsh birdeı jas balasyn tastap ketipti.
Nebári úsh jastaǵy búldirshin qyz eki jasar inisin qasyna, segiz aılyq sińlisin qolyna alyp, qardyń ústinde jylap otyr eken. Aıaz soryp, búrseń qaqqan balalardy sol úıdiń áıeli taýyp alyp, úıine kirgizip, quqyq qorǵaý organdaryna habar bergen. «Bala jalańaıaq eken. Butyna «jiberip» qoıypty, onysy qatyp qalǵan. Úlken sómkeni ashsam, ishinde áldı jatyr. Ol da juqa kıingen» dep suhbat berdi respýblıkalyq telearnalarǵa balalardy taýyp alǵan áıel. Osynaý aıanyshty aqparat, árıne, eldi dúr silkindirip, ashý-yzasyn týǵyzdy. Súp-súıkimdi úsh búldirshindi teledıdardan kórgenderdiń «Qandaı ǵana qatygez ana osyndaı beıkúná balalardy kóshege qıyp tastap ketti eken?» dep júrekteri qan jylaǵany anyq. Sonymen, polısııa «kókek anaǵa» izdeý jarııalady.
Bári keıin belgili boldy ǵoı. Baıaǵyda ájelerimiz balany uıyqtatarda «Áldı, áldı, baladan, taýyp alǵan daladan, dalada bala jata ma, túsip qapty shanadan...» dep áldıleýshi edi. Sol aıtpaqshy, bul balalar abaısyzda shanadan túsip qalmaǵan eken. Úsh birdeı balasyn qarǵa otyrǵyzyp ketti degen ana da tabyldy. Aqparattyń qaıdan shyqqanyn qaıdam, bireýler ony jeńil júristi áıel eken dep te jatty. Onyń qanshalyqty ras-ótirigin bir qudaı biler, biraq áıel óziniń qurylysta jumys isteıtinin aıtty. Eń qyzyǵy, bálkim, sumdyǵy shyǵar, úsh búldirshindi taýyp alǵan áıel balalarǵa bóten bolmady, týǵan ájesi bolyp shyqty. «1 qańtar kúni keshki saǵat besterde enem telefon shalyp, «Balalardy maǵan úıge ákelip ber», dep aıtty. Úsheýin kıindirip aparyp, óz qolyna tapsyryp kettim. Osynyń bárin qaıynsińlim kórip turdy. О́z bala-shaǵamdy qalaı kóshege tastaımyn?» dep shyryldaıdy úsh balanyń anasy. Onyń aıtýynsha, kúıeýi ekeýi azamattyq nekede bolǵan. Biraq, sońǵy jyldary birge turmaıtyn kórinedi. Sodan bolar, enesi ekeýiniń arasy jaqsy emes. Mine, bar jaǵdaı osy.
Árıne, ómir bolǵan soń, ene men kelinniń jaýlyǵy, arazdyǵy, dúrdarazdyǵy týraly talaı áńgimelerdi estip, keıbirin kózimiz de kórip edi. Biraq, «Apam da ań-tań, men de ań-tań» demekshi, mynadaı sumdyq jaǵdaı eldi aıran-asyr qylyp, júrekterin ustatty. Bul jerde eneni de, anany da aqtaýǵa bolmaıdy. Eger oqıǵa shynynda osylaı órbigen bolsa, týǵan nemerelerin tanymaı nemese tanyǵysy kelmeı, el-jurtqa «daladan taýyp aldym» dep jarııa qylǵandaǵy ájeniń maqsaty ne? Meıli, kelinimen araz eken, biraq, osy daýdy úı ishinde-aq, aǵaıyn arasynda-aq sheshýge bolmady ma? Jalpy, bul oqıǵada kimge senýge bolady? Balalardyń ákesi qaıda? Ol nege úndemeıdi? Endi, mine, ene men kelinniń arazdyǵynan beıkúná úsh sábı japa shegip otyr. Is tolyq bitkenshe 3 jasar Keremet beıimdeý ortalyǵynda, baýyrlary Mıras pen Káýsar qalalyq balalar aýrýhanasynda qalatyn boldy. О́ıtkeni, áli kúnge úsh balanyń da týý týraly kýálikteri joq. «О́ziniń ata-analyq mindetin durys oryndamaǵany úshin Qazaqstan Respýblıkasynyń Ákimshilik quqyq buzýshylyq kodeksiniń 111-baby boıynsha jaýapkershilikke tartylatyn bolady. Bul bapta arnaıy aıyppul qaralǵan. Qazir tergeý amaldary júrgizilip jatyr. Aıaqtalǵan soń barlyǵy tolyq belgili bolady», – deıdi Eńbekshi aýdandyq polısııa bólimi bastyǵynyń orynbasary Almas Myrzahmetov.
Oralhan DÁÝIT,
«Egemen Qazaqstan».
Ońtústik Qazaqstan oblysy.