Oblys ákimi Qanat Bozymbaevtyń qatysýymen ótken oblystyq máslıhattyń sessııasynda balalardyń quqyǵyn qorǵaý jónindegi basqarma oblystyq bilim berý basqarmasymen; qorshaǵan ortany qorǵaý jáne jer qoınaýyn paıdalaný, energetıka jáne turǵyn úı-kommýnaldyq sharýashylyǵy; kásipkerlik jáne saýda; týrızm, mádenıet, muraǵattar jáne qujattama bólimderiniń birigetini, qurylys basqarmasy jolaýshylar kóligi jáne avtomobıl joldary basqarmasyna qosylatyny habarlandy.
Oblys ákimi Qanat Bozymbaevtyń qatysýymen ótken oblystyq máslıhattyń sessııasynda balalardyń quqyǵyn qorǵaý jónindegi basqarma oblystyq bilim berý basqarmasymen; qorshaǵan ortany qorǵaý jáne jer qoınaýyn paıdalaný, energetıka jáne turǵyn úı-kommýnaldyq sharýashylyǵy; kásipkerlik jáne saýda; týrızm, mádenıet, muraǵattar jáne qujattama bólimderiniń birigetini, qurylys basqarmasy jolaýshylar kóligi jáne avtomobıl joldary basqarmasyna qosylatyny habarlandy.
Sessııa otyrysynda habarlanǵan mundaı qadam jalpy, memlekettik baǵdarlamalardy júzege asyratyn basqarmalar úshin jasalyp otyrǵany túsinikti. Áıtpese, buǵan deıin oblystyq ákimdik jumys kórinbeıtin, aty dardaı basqarmalar ashyp, árkimge bir úlestirýmen keldi. Qolda turǵanda qonyshynan basqandar únemshildikti, ysyrapshyldyqqa jol bermeýdi, talap pen tártipti umytqandaı. Budan halyqqa kelgen bes tıyn da paıda joq.
Endi bastalǵan ońtaılandyrý júıesi oblystaǵy alda atqarylar jumystar úshin tıimdi jol. Mysaly, oblysqa dál osy qazirgi ýaqytta týrızm basqarmasy qajet pe edi?.. Biz áýeli áleýmettik salalardy – aýyldardaǵy jol, aýyzsý, densaýlyq saqtaý, mádenıet salasy, mektep, balabaqshalardy tolyq jónge keltirip, halyqtyń kóńilinen shyǵyp alaıyq ta. Aýylǵa turǵyn úıler salaıyq. Jastar aýylǵa barsyn. Lebıaji aýdanynda dárigerler túgeldeı zeınet jasyna jetip qalypty. Al, týrızm basqarmasy, tipti, ashylǵanyna bir aı ýaqyt bolmaı jatyp-aq, qyrýar qarajat jumsap halyqaralyq forým ba, kórme me ótkizip te úlgerdi. Muraǵatshy-qujattamashylar da bir basqarmanyń tizginin ustap otyr edi, endi mádenıet basqarmasyna qosylyp ońtaılandy. Buǵan deıin muraǵatshy-qujattamashylar óz basqarmalaryndaǵy muraǵat-qujattamalarǵa baılanysty týyndaǵan biraz máselelerdi Mádenıet jáne aqparat mınıstrligine jetkize almaı júrip edi, endi izdegenge suraǵan. Al, oblystaǵy joldar jergilikti halyqtyń ýaıymyna aınaldy. Jolsaparlarǵa baratyn tilshiler – bizderdiń de basty qorqynyshymyz joldyń joqtyǵy. Lebıaji aýdanynyń aýyldarynyń tusymen ótetin halyqaralyq Omby – Maıqapshaǵaı baǵytynyń eki kólik syımaıtyn tap-tar jolynan kúndiz ótip almasań, túnde júrý asa qaýipti. Jýyrda ǵana osy jol boıynda bir otbasy túgelimen qaza boldy. Aýyldarǵa jolǵa shyqpaı turyp áýeli Tegistikke jete alamyz ba, Alǵabastyń tusyndaǵy respýblıkalyq jolǵa qarasty aınalma jóndeldi me ózi, Myńkóldiń joly shuńqyrdan aryldy ma dep surap jatamyz. Endigi bar úmit qurylys, jolaýshylar kóligi jáne avtomobıl joldary atty birikken basqarmada. Qorshaǵan ortany qorǵaý men jer qoınaýyn paıdalanýdy retteıtin basqarmaǵa Baıanaýyldyń aýyldary otyrǵan Maıkóbe, Taldykól, Sarykól, Keregetas kenishterine, Maıqaıyńǵa baryp qaıtsa jumys jetedi. Sol jerlerdegi aýyldar sýsyz, jolsyz, kenishterdiń kók tútinderiniń ortasynda kúl ortasynda qaldy. Qorshaǵan ortany qorǵaımyz dep jar salǵanda sondaımyz. Sondyqtan, oblysqa jańadan kelgen ákim Qanat Bozymbaevtyń bastamasymen sany bar, sapasy joq basqarmalardy biriktirý týraly ońtaılandyrý júıesi qolǵa alyndy. Endi, basqarma basshylardy qysqartý esebinen naqty jumys atqaratyn mamandar sany artady. Bul 2014 jylǵa arnalǵan oblystyq bıýdjettiń ákimshilik shyǵyndaryn 53 mıllıon teńgege azaıtatyn kórinedi. Al biriktirilgen basqarmalarda basshylarǵa tólenetin jalaqy boıynsha qazynanyń 16 mıllıon teńgesi, qyzmet kólikterin paıdalaný jaǵynan 36 mıllıon teńge únemdelmek. Sheneýnikter júretin kólikterdiń sany shamamen 30 paıyzǵa deıin azaıady. Oblys ákiminiń apparatynda 70 adam bolsa, olarǵa júzge jýyq adam qyzmet kórsetip kelipti.
Sondaı-aq, 14 bıýdjettik baǵdarlama da ońtaılandyrylady. Jekelegen mynadaı áleýmettik máselelerdiń basymdylyǵy men birinshi kezektilik sıpaty eskerile otyryp, basymdylyǵy joq biraz shyǵyndar qysqartyldy. Aıtpaqshy, oblysta eki oblystyq jáne «Regıon» dep atalatyn oblystyq jastar gazetteriniń redaksııalyq ujymdaryn qaraýyna alǵan «Analıtıkalyq aqparat ortalyq» JShS bar. Al «Ertis-Medıa Holdıngi» AQ atalmaqshy ekinshi bir ortalyq aýdandyq gazetterdi qosyp, aksıonerlik qoǵam jasamaqshy kórinedi. Negizinde, taldamalyq-aqparattyq bólim, jalpy, aýdandyq gazettermen baılanys oblystyq ishki saıasat basqarmasynyń jumysy sanalatyny belgili.
Endi bas-basyna ortalyq, basqarma, holdıng, aksıonerlik qoǵam qurǵandar da oblysta júrgizilip jatqan Qanat Bozymbaev qolǵa alǵan ońtaılandyrý júıesinen tys qalmas dep oılaımyz.
Farıda BYQAI,
«Egemen Qazaqstan».
Pavlodar oblysy.