Keshe Astanada «KAZENERGY» qaýymdastyǵy keńesiniń 15-shi otyrysy ótti. Keńeske qaýymdastyqtyń jetekshisi Tımýr Qulybaev tóraǵalyq etti.
Keshe Astanada «KAZENERGY» qaýymdastyǵy keńesiniń 15-shi otyrysy ótti. Keńeske qaýymdastyqtyń jetekshisi Tımýr Qulybaev tóraǵalyq etti.
Otyrysqa Premer-Mınıstrdiń orynbasary – Indýstrııa jáne jańa tehnologııalar mınıstri Áset Isekeshev, Munaı jáne gaz mınıstri Uzaqbaı Qarabalın, Qorshaǵan orta jáne sý resýrstary mınıstri Nurlan Qapparov, Ekonomıka jáne bıýdjettik josparlaý mınıstri Erbolat Dosaev pen birqatar vedomstvo basshylary men Májilis depýtattary qatysty. Keńeste Qazaqstan aýmaǵynda jumys isteıtin ári qaýymdastyq qataryna qabyldanǵan iri otandyq jáne sheteldik munaı-gaz ben energetıka kompanııalarynyń basshylarynan qurylǵan konsýltatıvtik keńes organynyń músheleri boldy. Sondaı-aq, otyrysqa Astanada issaparmen júrgen Halyqaralyq energetıkalyq agenttiktiń atqarýshy dırektory Marııa Van der Hoven arnaıy kelipti.
Jınalysty ashqan tóraǵa qaýymdastyqtyń energetıka salasynda osyǵan deıin atqarǵan jumystaryna toqtalyp, kún tártibindegi taqyrypty birlese talqylaýǵa shaqyrdy. Sóıtip, búgingi tańda qaýymdastyq energetıkalyq máseleler boıynsha halyqaralyq sharalarǵa belsene atsalysyp júrgenin tilge tıek etti. Tóraǵanyń aıtýyna qaraǵanda, bıyl Qazaqstan tuńǵysh ret Halyqaralyq energetıka konferensııasyna tóraǵalyq etip otyr eken. Osy arada atalǵan konferensııaǵa Qazaqstan tarapynan Munaı jáne gaz mınıstri U.Qarabalınniń tóraǵa bolyp taǵaıyndalǵanyn aıtty.
Áset Isekeshev keńes otyrysyna qatysýshylardy kezekti ıgi sharalarymen Úkimet atynan quttyqtap, elimizde energetıka salasynyń damý úrdisteri jóninde áńgimeledi. Qazaqstannyń birtindep «jasyl ekonomıka» men «jasyl energetıkany» ıgere bastaǵanyn aıtty. Halyqaralyq talaptarǵa saı qýat kózderin tıimdi ári únemdep paıdalaný sharalary elimizde qanat jaıyp kele jatqanyna basymdyq berdi.
Munaı jáne gaz mınıstri tabıǵı resýrstardy ıgerýde qoldanylyp jatqan jańa tehnologııalar men saladaǵy ǵylymı negizderdegi jetistikterge toqtaldy. Ol Qazaqstanda qazirgi tańda aldaǵy 50-60 jylǵa jetetin munaı men gaz anyq bar ekenin aıtty.
Otyrysta Halyqaralyq energetıkalyq agenttiktiń atqarýshy dırektory da baıandama jasady. Ol búgingi kúnde álemniń bet-bederi tez ózgerip jatqanyna toqtaldy. AQSh sııaqty keshegi energııa resýrstaryn ımporttaýshy alpaýyt elderdiń endi eksporttaýshyǵa aınalyp bara jatqanyn aıtty.
Otyrysta erekshe nazar aýdararlyq taǵy bir oqıǵa boldy. Onda «KAZENERGY» qaýymdastyǵy daıyndaǵan ulttyq energetıkalyq baıandama resmı túrde tanystyryldy. Irgeli qujatta munaı-gaz salasyna jáne jalpy bútindeı otandyq energetıkanyń bolashaqtaǵy damýyn josparlaýǵa qajetti elimizdiń energetıkalyq balansynyń negizgi tetikteri aıqyndalypty.
Otyrysty qorytyndylaǵan T.Qulybaev jıynnyń nátıjeli ótkenin aıtyp, «KAZENERGY» halyqaralyq arenada el bedelin nyǵaıta beretinin bildirdi.
Nurbaı ELMURATOV,
«Egemen Qazaqstan».