Qarshadaı Iýlııany ákesi Evgenıı men anasy Svetlana alty jasynda oblys ortalyǵynyń irgesinde jańadan ashylǵan frıstaıl seksııasyna apara bastady. Anna Kornysheva degen jattyqtyrýshy Iý.Galyshevanyń boıyndaǵy ójettikti birden baıqap, ony erekshe qamqorlyǵyna aldy.
Dúnıe dodasynyń dúbiri
HHII Qysqy Olımpıadanyń bastalýyna 21 kún qaldy
Qarshadaı Iýlııany ákesi Evgenıı men anasy Svetlana alty jasynda oblys ortalyǵynyń irgesinde jańadan ashylǵan frıstaıl seksııasyna apara bastady. Anna Kornysheva degen jattyqtyrýshy Iý.Galyshevanyń boıyndaǵy ójettikti birden baıqap, ony erekshe qamqorlyǵyna aldy.
Mogýldyń qyr-syryn úıretip qana qoımaı, qysqy sporttyń qyzyǵy men shyjyǵynyń da kezdesetinin san márte eskertti. Frıstaıldyń mogýl túriniń erekshelikteri men qıyndyqtary az emes. Arnaıy jasalǵan kedir-budyrly tramplınnen sekirgen kezde ókpeń óshkendeı jaǵymsyz kúıge túsetiniń óz aldyna bir bólek. Amal bar ma, eki jyldan keıin bapkeri Germanııaǵa qonys aýdardy. Alaıda, ol talaby taýdaı qyzdan úmit kútetinin atap aıtyp, daryndy balalarǵa arnalǵan sport mektebiniń jattyqtyrýshysy Vıktor Lemeshkoǵa tapsyryp ketti.
V.Lemeshko óz tobyndaǵy qyzdardan tabandylyq pen izdenisti, qaısarlyq pen ójettikti talap etti. Joǵaryda atap kórsetilgenindeı, Frıstaıldyń basqa qysqy sport túrlerine qaraǵanda qıyndyqtary kóp. Sondyqtan bolar, bul sport túrine ekiniń biri táýekel etip bara bermeıdi. Al qazaq qyzdary úshin bul tipti tańsyq, qupııasy mol sport túri deýge týra keledi. Bir súısinerligi, qazaqtyń qaraqat kóz qyzy Aıaýlym Ámirenova frıstaıldyń mogýl túri seksııasyna jazylyp, aınalasy úsh jylda tolaıym tabystarǵa jetip úlgerdi. Tórt jasynda shańǵyny aıaǵyna ilgen Aıaýlym I Qysqy jastar oıyndarynda, birneshe halyqaralyq jarystarda jeńimpaz atandy. «Kúni erteń Ámirenova álem chempıonatynda altynnan alqa taǵyp jatsa, tańdanbańyzdar», – deıdi bapker V.Lemeshko.
– Sochı Olımpıadasyna baratyn frıstaılshylar qazir Amerıkada jattyǵyp, álem kýbogy kezeńinde biliktiligin arttyryp jatyr. Jaqynda ǵana Aq Olımpıadaǵa baratyn Dmıtrıı Reıherd, Darıa Rybalova men Iýlııa Galysheva Kanadanyń Kalgarı qalasynda ótken álem kýbogynyń kezeńinde kúsh synasyp, alǵashqysy 6-shy oryn, keıingileri 13, 19-shy oryndardy qanaǵat tutty. Frıstaılshylar úshin dúbirli dodanyń endi ǵana bastalǵanyn eskersek, qalǵan úsh apta ýaqytta olar tájirıbelerin shyńdap, Olımpıadada jaqsy nátıje kórsetedi degen oıdamyz. Tipti úsheýiniń biri medalǵa ıe bolar degen úmitimiz bar, – dep qysqy sport túrleri boıynsha joǵary sport mektebiniń dırektory, kezinde dzıýdo men sambo kúresinen halyqaralyq jáne respýblıkalyq jarystarda san márte top jarǵan Serik Halelov aǵynan jaryldy.
Iý.Galyshevanyń frıstaıldaǵy alǵashqy tabysy on jyl buryn bastaldy. Ol nebári 11 jasta bolatyn. Reseıdiń Sankt-Peterbýrg qalasyndaǵy kórshi memlekettiń kýbogy jarysynda aıdy aspanǵa shyǵaryp, kýbokty ıelendi. Arada úsh jyldan keıin el birinshiliginde kúmispen kúpteldi. 2008 jyly Eýropanyń eki dúrkin chempıony atanyp, halyqaralyq dárejedegi sport sheberi normasyn oryndady. 2009 jyly Japonııada ótken álem chempıonatynda alǵashqy úshtikten kórine almasa da, bapkerlerdiń nazaryna ilikti. Juptasyp óner kórsetýde álem chempıony atandy. Bul alǵashqy iri jeńisi bolatyn. Vankýverde ótken Aq Olımpıadada mogýlde jap-jaqsy óner kórsetip edi, amal bar ma, tóreshiler kópe-kórineý qııanat jasap, 11-shi orynǵa bir-aq syrǵytty. Sol ádiletsizdikke de tózimdilik tanytty. Esesine, 2010 jyldyń jeltoqsanynda Fransııanyń Merıbel qalasynda ótken álem kýbogy kezeńinde altynnan alqa taqty.
Almaty men Astanada ótken Qysqy Azııa oıyndaryna óskemendik óren tas-túıin ázirlikpen keldi. Bapkerleri men anasy, jerlesteri, ózi bilim alyp júrgen Almatydaǵy Týrızm jáne sport akademııasynyń rektory Qaırat Zakarııanov jankúıer retinde Tabaǵandaǵy sport keshenine kelip, Iýlııanyń jeńiske jetýin tiledi. Ol eki ret jarys jolyna shyǵyp, qos altyndy omyraýyna taqqan kezde anasy jylap jiberip, budan birneshe jyl buryn o dúnıelik bolǵan áke amanatynyń oryndalǵanyna shúkirshilik etti. 2011 jyldyń 7 qańtarynda Shyǵys Qazaqstan oblysynyń ákimi Berdibek Saparbaev bastaǵan myńǵa tarta jankúıer Azııadan jeńispen oralǵan shańǵyshylar, frıstaılshylar men bıatlonshylarǵa erekshe qurmet kórsetti. Máselen, óńir basshysy temir tulpar men aqshalaı syılyqtar tabys etti.
Qańtardyń 20-synan keıin Sochı Olımpıadasyna qatysatyn sportshylar О́skemende bas qospaq. Dástúr boıynsha Berdibek Máshbekuly olarǵa aq jol men jeńis tileıtin bolady. Bul joly búkil qazaqstandyqtar shańǵyshy Alekseı Poltoranın, frıstaılshylar Dmıtrıı Reıherd, Darıa Rybalova, Iýlııa Galysheva jáne basqalardan úmit kútedi.
Ońdasyn ELÝBAI,
«Egemen Qazaqstan».
О́skemen.